“Telegram” messenceri Rusiyada 1 apreldən etibarən tamamilə bloklanacaq.
Herbiand.az xəbər verir ki, “Baza” “Telegram” kanalı bu barədə bir neçə dövlət qurumundakı öz mənbələrinə istinadən məlumat verib.
Kanalın mənbələrinə görə, Roskomnadzor 1 apreldən etibarən messencerin tamamilə bloklanmasına başlayacaq.
Tədbir bütün Rusiya ərazisində tətbiq olunacaq: tətbiq nə mobil, nə də stasionar şəbəkələrdə yüklənməyəcək.
Hələlik məlumatın rəsmi təsdiqi yoxdur.
Roskomnadzor 10 fevralda Rusiyada “Telegram”ın fəaliyyətini məhdudlaşdırmağa başlayıb. Agentliyin məlumatına görə, yavaşlama Rusiya qanunlarının pozulması ilə əlaqədardır.
“Telegram”ın qurucusu Pavel Durov ingilisdilli kanalında Rusiyada messencerə qoyulan məhdudiyyətlərə cavab verib. O, bunu rusları "nəzarət və siyasi senzura üçün nəzərdə tutulmuş dövlət tərəfindən idarə olunan tətbiqdən" istifadə etməyə məcbur etmək cəhdi ilə əlaqələndirib.
Durov xatırladıb ki, İran 2018-ci ildə də eyni strategiyanı sınaqdan keçirib və uğursuz olub. Sahibkarın sözlərinə görə, qadağaya baxmayaraq, iranlıların əksəriyyəti hələ də Telegramdan istifadə edir və dövlət tərəfindən idarə olunan tətbiqlərdən daha çox onu üstün tutur. Durov Telegramın söz azadlığı və şəxsi həyatın toxunulmazlığını müdafiə etdiyini vurğulayıb.
