Trampın şəxsi təyyarəsi yeni rənglərə boyanacaq
Ajans.az xəbər verir ki, Fox News telekanalı bu barədə ABŞ Hərbi Hava Qüvvələrinin sözçüsünə istinadən məlumat yayıb. Məlumata görə, yeni prezident təyyarəsi Donald Trampın sevdiyi rənglərə – qırmızı, ağ və tünd göy çalarlara boyanacaq. Yenilənmiş dizaynda qızılı zolaq da nəzərdə tutulur. Hərbi Hava Qüvvələrinin sözçüsü bildirib ki, yeni rəng sxemi “Air Force One” kimi istifadə üçün uyğunlaşdırılan iki Boeing VC-25B təyyarəsi də daxil olmaqla, bütün icraçı təyyarələrə şamil olunacaq. Onun sözlərinə görə, proqram Boeing 747-8i və dörd ədəd Boeing C-32 təyyarəsini də əhatə edir. Sözçü qeyd edib ki, ilk C-32 təyyarəsi artıq yeni dizayna uyğun rənglənib və yaxın aylarda ABŞ Hərbi Hava Qüvvələrinə təhvil veriləcək. Qeyd edək ki, “Air Force One” 60 ildən artıqdır mavi və ağ rənglərdədir. Mövcud dizayn 1960-cı illərin əvvəllərində Prezident John F. Kennedy dövründə təsdiqlənib. “Air Force One” termini ABŞ Prezidentini daşıyan istənilən ABŞ Hərbi Hava Qüvvələrinə məxsus təyyarə üçün istifadə olunan çağırış işarəsidir. Hazırda prezident donanması iki xüsusi təchiz edilmiş Boeing 747-200B (VC-25A) təyyarəsindən ibarətdir və onların gələcəkdə VC-25B (Boeing 747-8i) ilə əvəzlənməsi planlaşdırılır.
