Pakistan Kosmik və Yuxarı Atmosfer Tədqiqatları Komissiyası (SUPARCO) Çinin “Yangjiang” kosmodromundan ölkənin yerli olaraq hazırlanmış ikinci elektro-optik peykini (EO-2) uğurla orbitə çıxarıb.
“Poliqon” ISPR-ə istinadən xəbər verir ki, bu hadisə Pakistanın artan kosmik imkanları baxımından növbəti mühüm mərhələ hesab olunur.
EO-2 peyki SUPARCO-nun Peyk Tədqiqat və İnkişaf Mərkəzində (SRDC) daxili elmi-tədqiqat və sistem mühəndisliyi imkanları ilə layihələndirilib, hazırlanıb və inteqrasiya edilib. Bu proses Pakistanın peyk dizaynı, faydalı yük inteqrasiyası, sınaqlar və missiya hazırlığı sahələrində genişlənən texniki potensialını nümayiş etdirir.
EO-1 peyki ilə birlikdə fəaliyyət göstərmək üçün nəzərdə tutulan EO-2 müxtəlif işıqlandırma şəraitində Yer səthini müşahidə edə bilir. Bu isə səth xüsusiyyətlərinin daha dəqiq təhlilinə, dəyişikliklərin izlənməsinə və görüntüləmə davamlılığının artırılmasına imkan yaradır. Yeni peyk Pakistanın Yer müşahidə imkanlarını gücləndirərək milli planlaşdırma, idarəetmə, resursların idarə olunması və yerli mühəndislik əsasında etibarlı kosmik sistemlərin inkişafı üçün məlumat təminatını genişləndirir.
