Kralyevo şəhərində tutulan şəxslərin prezident və ailə üzvlərinə qarşı qəsd planlaşdırdığı iddia olunur...
Serbiyanın Kralyevo şəhərində polis və əks-kəşfiyyat əməkdaşları 1975 və 1983-cü il təvəllüdlü iki kişini zorakı yolla dövlət quruluşunu dəyişdirməyə cəhd planlaşdırmaqda şübhəli bilərək saxlayıblar.
Poliqon xəbər verir ki, bu barədə Serbiya Daxili İşlər Nazirliyinin mətbuat xidməti məlumat yayıb. Bildirilib ki, saxlanılan şəxslər 48 saat müddətinə həbs edilib və iş üzrə materiallar Ali Prokurorluğa göndərilib.
İstintaqın ilkin qənaətinə görə, şübhəlilər 2025-ci ilin dekabr ayından 2026-cı ilin fevral ayınadək Serbiya Prezidenti Aleksandar Vuçiçi və onun ailə üzvlərini öldürmək planı üzərində işləyiblər. Hüquq-mühafizə orqanları hazırda onların mümkün əlaqələrini və motivlərini araşdırır.
Eyni zamanda, aparılan axtarışlar zamanı real silah arsenalının və ya xüsusi texniki vasitələrin aşkar edilməsi barədə hələlik rəsmi məlumat verilməyib. İstintaq tədbirlərinin davam etdiyi və əlavə sübutların toplanması istiqamətində iş aparıldığı bildirilib.
“RIA Novosti” agentliyi qeyd edir ki, Vuçiçə qarşı planlaşdırıldığı iddia olunan sui-qəsdlərlə bağlı məlumatlar mütəmadi olaraq gündəmə gəlir. Prezident özü də sosial şəbəkələrdə və internet məkanında minlərlə təhdid mesajı aldığını dəfələrlə bəyan edib.
Məlumatlara görə, 2012-ci ildən bəri Serbiyada dövlət başçısına qarşı silahlı hücumla bağlı qaldırılan işlər üzrə icraçılar barəsində yekun məhkəmə hökmü çıxarılmayıb. Bu fakt isə ölkədə təhlükəsizlik tədbirlərinin və hüquqi prosedurların effektivliyi ilə bağlı müzakirələrə səbəb olur.
Poliqon.info
