Yerli mətbuatda dərc olunan iddialara görə, Azərbaycanda “Bolt” platforması ilə əməkdaşlıq edən bir sıra park sahibləri və sürücülər şirkətin yerli idarəetmə strukturlarında sistemli haqsızlıq, selektiv yanaşma və korrupsiya elementləri ilə üzləşdikləri barədə şirkətin Estoniyadakı rəhbərliyinə şikayətlərini bildiriblər. “Bolt”la əməkdaşlıq edən bir neçə sahibkarın şikayəti nəticəsində şirkətin Bakı ofisində yoxlamalar aparılıb. Şirkət daxilində maliyyə və idarəetmə prosesləri yoxlanılıb. Ciddi pozuntular aşkarlanan Bakı ofisinin rəhbəri Naim Əzizov və bir neçə səlahiyyətli şəxs işdən azad edilib.
İddialar ilə əlaqədar Marja.az “Bolt” şirkətinə sorğu göndərmişdi.
Marja.az-ın sorğusuna cavab olaraq bildirilib:
""Bolt"un Azərbaycandakı səfər xidməti üzrə rəhbərliyində dəyişikliklərin baş verdiyini təsdiqləyə bilərik. Bu qərar taksi əməliyyatlarımıza və digər biznes istiqamətlərimizə təsir göstərmir.
Platforma üzrə bütün tərəfdaşlardan, o cümlədən avtopark sahiblərindən, uyğunluq, dürüstlük və qanunvericiliyə əməl etmə standartlarımıza riayət etmələrini gözləyirik. Siyasətlərimizə və daxili nəzarət prosedurlarımıza tam əməkdaşlıq etməyi tələb edirik və bu standartlara əməl olunmadığı hallarda müvafiq tədbirlər görürük.
Uyğunluq və şəffaflığa davamlı öhdəliyimizin bir hissəsi olaraq, fəaliyyət göstərdiyimiz bazarlarda əməliyyat və maliyyə proseslərini mütəmadi olaraq qiymətləndiririk. Bolt hər hansı qanunsuz və ya etik normalara zidd davranış iddialarına son dərəcə ciddi yanaşır. Daxili siyasətlərimizin, etik standartlarımızın və tətbiq olunan qanunların pozulmasına qarşı sıfır tolerantlıq prinsipini tətbiq edirik.
Sürücüləri və avtopark tərəfdaşlarını rəsmi müraciət vasitələrimizdən istifadə edərək hər hansı narahatlıq və ya şübhəli halları bildirməyə çağırırıq ki, bu məsələlər lazımi qaydada araşdırılsın.
Bolt Azərbaycanda ədalətli, şəffaf və qanunvericiliyə uyğun fəaliyyət göstərməyə tam sadiqdir. Prioritetimiz sürücülərin, avtopark tərəfdaşlarının və müştərilərin təhlükəsiz və bərabər platforma təcrübəsinə arxalana bilməsidir".
