Kaliforniyanın Şimal dairəsi üzrə federal məhkəməsi İlon Maskın xAI şirkətinin OpenAI-yə qarşı kommersiya sirrlərinin oğurlanması ilə bağlı iddiasını rədd edib. Hakim Rita Lin qərarında bildirib ki, Maskın şirkəti OpenAI tərəfindən hüquqazidd hərəkətlərə dair sübut təqdim etməyib. İddia 2025-ci ilin sentyabrında qaldırılmışdı.
xAI iddia edirdi ki, OpenAI məqsədli şəkildə əməkdaşları öz tərəfinə çəkərək Grok çat-botunun mənbə koduna və data mərkəzlərinin qurulması strategiyalarına çıxış əldə etməyə çalışıb. Şikayətdə xAI-dən OpenAI-yə keçmiş azı səkkiz keçmiş əməkdaşın adı çəkilirdi və onlardan ikisinin guya kommersiya sirrlərini oğurladığını etiraf etdiyi bildirilirdi.
Lakin hakim qeyd edib ki, bütün ittihamlar konkret əməkdaşların hərəkətlərinə aiddir, cavabdeh şirkətin özünə yox. Məhkəmənin qənaətinə görə, xAI OpenAI-nin kimisə sirr oğurlamağa sövq etdiyinə və ya işə qəbuldan sonra oğurlanmış materiallardan istifadə etdiyinə dair fakt təqdim etməyib.
İddia yenidən işlənməsi hüququ saxlanılmaqla rədd olunub — xAI 17 mart tarixinə qədər düzəliş edilmiş şikayət təqdim edə bilər. OpenAI bəyanatında iddianı “əsassız” və “Maskın təqib kampaniyasının növbəti mərhələsi” adlandırıb. xAI-nin vəkilləri qərarı hələlik şərh etməyiblər.
Bu iş Mask və OpenAI arasında genişmiqyaslı hüquqi qarşıdurmanın yalnız bir hissəsidir. Ayrı bir iddiada Mask, şirkətin həmtəsisçisi kimi çıxış edərək, OpenAI və Microsoft-dan qeyri-kommersiya missiyasından uzaqlaşma və “qanunsuz varlanma” ilə bağlı 134,5 milyard dollara qədər təzminat tələb edir. Bu iş üzrə münsiflər heyətinin seçimi 27 aprel tarixinə təyin olunub.
