“Mənim ümumiyyətlə bu söhbətdən xəbərim yoxdur. Azərbaycan Kinematoqrafçılar İttifaqının (AKİ) da üzvü deyiləm. Ona görə də proseslərin necə tənzimlənməsi haqqında heç bir məlumatım yoxdur. Rəhbərliyə də gətirilməyim haqqında söhbətləri eşitməmişəm. Müzakirə etmək imkanım da yoxdur. Yenə də Şeyx Əbdülə mənə verdiyi qiymətə görə təşəkkür edirəm”.
Bunu “Yeni Sabah”a Əməkdar incəsənət xadimi, rejissor Elxan Cəfərov deyib.
O özünü köhnə Azərbaycan kino məktəbinin davamçılarından biri sayır:
“Həmin nəslin demək olar ki, hamısı məni tanıyır və işimə də bələddirlər. Çox şadam, çox məmnunam və hər birinə də hörmətlə yanaşıram. Yeni kino məktəbi bir az başqa formatdadır. Hamı müasirliyə can atır. Yeni yolla hərəkət edirlər. Mən isə köhnə yolun davamçılarındanam. Ona görə də həmişə çalışıram yeni və köhnə yolu özümdə cəmləşdirə bilim. Çünki sırf köhnə istiqamətə köklənmə də alınmır. Həm yaşlı nəslə, həm də cavan nəslə uyğun olan işlər təqdim etmək lazımdır”.
Rejissor yenidən “Azərbaycanfilm” kinostudiyasında film çəkilməsi üçün çalışır:
“İllərdir “Azərbaycanfilm” kinostudiyasında fəaliyyət göstərirəm. Hər zaman buradayam, burada da olacam. Çalışırıq ki, kinostudiyanı yenidən dirçəldək. Fəaliyyəti bərpa etmək üçün əlimizdən gələni edirik. Ümid edirəm ki, hər şey yaxşılığa doğru dəyişəcək” .
Xatırlatma: Xalq artisti Əbdül Mahmudbəyov AKİ sədri Rasim Balayevin səhhətində yaranmış problemə görə AKİ-nin yeni qurultay keçirməsi və sədrliyə rejissor Elxan Cəfərovun namizədliyini irəli sürməni məsləhət görmüşdü.
Aydan Hacı
Telegram kanalımız
