Bakı, 25 fevral, Xatirə Cəfərova, foto İlqar Cəfərov, AZƏRTAC
Elmi mühitimiz üçün Prezident İlham Əliyevin ötən il noyabrın 3-də Milli Elmlər Akademiyasının 80 illik yubiley yığıncağında dərin məzmunlu, proqram xarakterli parlaq nitqi ilə Azərbaycan elminin, AMEA-nın mükəmməl yol xəritəsi müəyyən edilib.
AZƏRTAC xəbər verir ki, bunu Azərbaycan Milli Elmlər Akademiyasının prezidenti akademik İsa Həbibbəyli AMEA-nın illik Ümumi yığıncağında söyləyib.
Akademik vurğulayıb ki, dövlətimizin başçısının Azərbaycan dilinin təhlükəsizliyinin qorunması, daxili imkanlar hesabına zənginləşdirilməsi haqqındakı çağırışlarına cavab olaraq ana dili – dövlət dilinin əsas amil olduğu Akademiyanın Humanitar və İctimai Elmlər bölmələrinin elmi-tədqiqat institutlarında bu məsələ ön mövqeyə çıxarılıb, bir çox əhəmiyyətli tədqiqatların icrası daha da aktivləşdirilib.
