Yanvarın sonunda London Metal Birjasında misin qiyməti tarixdə ilk dəfə olaraq bir ton üçün 14 527,5 dollara yüksəlib. Bundan sonra korreksiya baş verib və fevral ayının böyük hissəsində kotirovkalar 13 000 dollar səviyyəsində formalaşıb.
“Citi Research” analitiklərinin fikrincə, qiymət artımının davam etməsi potensialı qalmaqdadır. Onlar proqnozlaşdırırlar ki, yaxın 3 ay ərzində misin qiyməti yenidən bir ton üçün 14 000 dollara çata bilər.
“Qiymətlərin istiqamətini dəqiqliklə proqnozlaşdırmaq çətindir, lakin qısamüddətli perspektivdə risk-gəlir nisbətində ‘buğa’ meyli görürük. Bu, enişlər zamanı investorların mis alışı və Çin Yeni ilindən sonra ehtiyatların yenidən artırılması fonunda mümkün dəstəklə bağlıdır”, — deyə “Citi” analitikləri bildiriblər.
Son 12 ayda — 25 fevral tarixinə olan vəziyyətə görə — Londonda misin qiyməti 41% artıb. 2026-cı ilin əvvəlindən isə qiymətlər 6,8% yüksəlib.
