Vaşinqton hesab edir ki, XXI əsrdə legitim razılaşma üçün prosesdə ABŞ, Rusiya və Çin iştirak etməlidir...
Poliqon xəbər verir ki, ABŞ silahlara nəzarət üzrə mümkün yeni sazişdə Çinin də tərəf kimi iştirak etməsinin vacibliyini vurğulayır. ABŞ-nin dövlət katibi Marko Rubio bildirib ki, real və legitim razılaşma üçün üç əsas gücün, ABŞ, Rusiya və Çinin prosesə qoşulması zəruridir.
Marko Rubio jurnalistlərə açıqlamasında deyib ki, ABŞ prezidenti hesab edir ki, XXI əsrdə imzalanacaq istənilən ciddi saziş, o cümlədən nüvə sazişi, yalnız üç ölkənin iştirakı ilə legitim hesab oluna bilər. Onun sözlərinə görə, qlobal təhlükəsizlik arxitekturası artıq ikitərəfli formatdan kənara çıxıb və Pekinin prosesə cəlb olunması vacibdir.
Dövlət katibi əlavə edib ki, Çin rəsmiləri öz nüvə potensiallarının ABŞ və Rusiya ilə müqayisədə xeyli geri qaldığını bildirsələr də, Pekinin “çatışmazlığı aradan qaldırmaq potensialı var və artıq bu istiqamətdə irəliləyir”. Rubio vurğulayıb ki, Vaşinqton Çinin silahlara nəzarət mexanizminə qoşulması üçün səylərini davam etdirəcək.
“Bütün dünya üçün belə bir razılaşmanın əldə olunması müsbət olardı”, deyə Marko Rubio qeyd edib.
Bundan əvvəl ABŞ-nin bu həftə Cenevrədə Çin nümayəndələri ilə nüvə silahlarına nəzarət məsələsi üzrə danışıqlar aparmağı planlaşdırdığı barədə məlumat yayılmışdı. ABŞ prezidenti dəfələrlə çıxışlarında Çinin silahlara nəzarət danışıqlarına cəlb edilməsinin vacibliyini dilə gətirib.
Fevralın əvvəlində Çin Xarici İşlər Nazirliyinin nümayəndəsi Lin Szyan bəyan edib ki, hazırkı mərhələdə Çin nüvə silahlarının azaldılması ilə bağlı danışıqlarda iştirak etməyi zəruri hesab etmir. Onun sözlərinə görə, Çinin nüvə potensialı ABŞ və Rusiya ilə müqayisədə tamamilə fərqli səviyyədədir və Pekin indiki dövrdə nüvə tərksilahı üzrə danışıqlara qoşulmayacaq.
Müşahidəçilər hesab edirlər ki, böyük güclər arasında strateji balansın qorunması və silahlanma yarışının qarşısının alınması məsələsi yaxın dövrdə beynəlxalq gündəliyin əsas mövzularından biri olaraq qalacaq.
Poliqon.info
