Bakı, 26 fevral, AZƏRTAC
ABŞ vitse-prezidenti Cey. Di. Vens İranın nüvə silahı əldə etməsinə icazə verilməyəcəyini bildirib və diplomatiyanın Tramp administrasiyasının üstünlük verdiyi yol olaraq qaldığını vurğulayıb. Bununla belə, o, digər variantların da masada qaldığı barədə xəbərdarlıq edib.
AZƏRTAC xəbər verir ki, Vens “Fox News” telekanalına müsahibəsində Prezident Donald Trampın bəyanatını xatırladıb: “İran nüvə silahına sahib ola bilməz”.
Vitse-prezident əlavə edib: “Əgər Tehranın seçdiyi yol budursa, hərbi məqsəd əsas olacaq. Əlbəttə, Prezidentin dediyi kimi, üstünlük verilən diplomatiya yolu ilə buna nail olmağa çalışırıq. Amma məsələ çox sadədir. İranın dünyanı nüvə terroru ilə təhdid edə bilməyəcəyi bir vəziyyətə çatmalıyıq”.
Vens iddia edib ki, amerikalıların əksəriyyəti İranın nüvə silahı potensialını inkişaf etdirməsinə icazə verilməməsi ilə razıdır. O, bunu milli və qlobal təhlükəsizlik məsələsi adlandırıb. Vitse-prezident deyib: “Tramp bu məsələni diplomatik yolla həll etməyə çalışacaq, amma Prezidentin sərəncamında bir sıra başqa vasitələr də var”.
İran və ABŞ nümayəndə heyətləri cümə axşamı günü İsveçrənin Cenevrə şəhərində Omanın vasitəçiliyi ilə dolayı nüvə danışıqlarının üçüncü raundunu keçirməyə hazırlaşır. Vens iranlıların danışıqlara ciddi yanaşacağına ümid etdiyini bildirib. O, həmçinin İranın Ali Liderinin vəzifədən uzaqlaşdırılması ilə bağlı hər hansı fərziyyə irəli sürməkdən imtina edib. “Biz iranlılarla daha bir raund diplomatik danışıqlar aparırıq və ağlabatan bir razılaşma əldə etməyə çalışırıq. İran nüvə silahına sahib ola bilməz. Bu, çox sadədir. Ümidvarıq ki, ordunun müdaxiləsi olmadan yaxşı bir qərara gələ biləcəyik”, deyə o əlavə edib.
