“Netflix” striminq xidməti “Paramount Skydance Corporation”ın (PSKY) yeni təklifindən sonra “Warner Bros. Discovery”ni (WBD) almaqla bağlı razılaşmadan imtina edib. Bu barədə “Netflix”in rəhbərləri Ted Sarandos və Qreq Piters bildiriblər.
Bundan əvvəl WBD “Paramount Skydance”in birləşmə ilə bağlı yeni təklifini “Netflix”lə mümkün razılaşmadan daha sərfəli adlandırmışdı. “Paramount Skydance”in son təklifi ilə eyni səviyyəyə çatmaq üçün tələb olunan qiymət fonunda sövdələşmə artıq maliyyə baxımından cəlbedici deyil. Buna görə də təklifimizi “Paramount Skydance” səviyyəsinə qaldırmaqdan imtina edirik”, — deyə bəyanatda qeyd olunub.
Xidmətin rəhbərləri vurğulayıblar ki, onlar “Warner Bros.”un kult brendlərinin etibarlı idarəçiləri ola bilərdilər və razılaşma ABŞ əyləncə sənayesini gücləndirəcəkdi. “Lakin bu sövdələşmə hər zaman düzgün qiymət olduğu halda “xoş əlavə” idi, heç bir halda “zəruri alış” deyildi”, — deyə onlar əlavə ediblər.
Dekabr ayında məlum olmuşdu ki, “Netflix” “Warner Bros. Discovery”dən “Warner Bros.” kinostudiyasını, “HBO Max” striminq xidmətini və “HBO” kanalını alacaq. Şirkətlər razılaşmanın bağlandığını elan etmişdilər.
Bundan əvvəl “Paramount” hər səhm üçün 30 dollar təklif etmişdi, lakin “Warner Bros. Discovery” bunu “Netflix”lə potensial sövdələşmə ilə müqayisədə “daha az sərfəli” hesab edərək rədd etmişdi. Bu həftə, fevralın 25-də CNN məlumat verib ki, “Paramount Skydance” alış təklifini rəsmi olaraq hər səhm üçün 31 dollara qədər artırıb.
“Reuters” daha əvvəl yazmışdı ki, “Paramount” təklifi artıracağı halda “Netflix”in də öz təklifini yaxşılaşdırmaq üçün kifayət qədər vəsaiti var. Bununla belə, Sarandos fevralın 20-də “Variety”yə müsahibəsində “Paramount”un qiyməti artırmasına necə reaksiya verəcəklərini açıqlamayıb.
Fevralın əvvəlində ABŞ Ədliyyə Nazirliyi “Netflix”ə qarşı genişmiqyaslı araşdırmaya başlayıb. “Bloomberg”in məlumatına görə, yoxlama çərçivəsində qurum təkcə sövdələşməni deyil, həm də şirkətin bazardakı davranışını araşdıracaq. Lakin “Netflix”in hüquqşünası Stiven Sanşayn bildirib ki, nazirlik standart yoxlama aparır.
