ABŞ və İsrailin İrana qarşı başlatdığı "Epic Fury" hərbi əməliyyatı ölkə daxilində böyük qorxu və xaosla müşayiət olunur.
AFN.az "Reuters"ə istinadən xəbər verir ki, paytaxt Tehran daxil olmaqla, Təbriz, İsfahan və Yəzd kimi iri şəhərlərdə baş verən güclü partlayışlar əhalini küçələrə töküb.
Şəhərlərdən qaçış başlayıb
Şahidlərin sözlərinə görə, səhər saatlarında iş həftəsinin başlaması ilə eyni vaxta düşən bombardmanlar nəticəsində insanlar övladlarını məktəblərdən götürərək şəhər kənarına qaçmağa çalışırlar. Yanacaqdoldurma məntəqələrində kilometrlərlə növbələr yaranıb, bankomatların qarşısında isə nağd pul və valyuta almaq istəyən minlərlə insan toplaşıb. Bir çox vətəndaş Türkiyə sərhədinə yaxın olan Urmiya kimi şəhərlərə üz tutaraq ölkəni tərk etməyə çalışır.
Rəsmi Tehrandan müraciət: "Şəhərləri tərk edin"
İranın ali təhlükəsizlik orqanları hücumların davam edəcəyini bəyan edərək, əhalini imkan daxilində təhlükəsiz bölgələrə getməyə çağırıb. Ölkə boyu məktəb və universitetlərdə dərslər qeyri-müəyyən müddətə dayandırılıb. Tehranda Ali liderin ofisi, Prezident iqamətgahı və parlament binasına gedən yollar təhlükəsizlik qüvvələri tərəfindən bağlanıb.
Xatırladaq ki, hücumlar Cenevrə danışıqlarının uğursuzluqla bitməsindən cəmi iki gün sonra başlayıb ki, bu da xalq arasında hakimiyyətə qarşı inamsızlığı artırıb.
