ABŞ istiqamətindən Kubaya daxil olan silahlı qrupun sərhədçilərlə atışmaya girdiyi, saxlanılan şəxslərin isə ağır cəza ilə üzləşə biləcəyi bildirilir...
Poliqon xəbər verir ki, bu barədə Reuters Agentliyi məlumat yayıb. Məlumata görə, Kuba prokurorluğu ABŞ istiqamətindən ölkə ərazi sularına daxil olan katerin altı ekipaj üzvünə qarşı rəsmi şəkildə “terror cinayətləri” ittihamı irəli sürüb və onların məhkəməyədək həbsdə saxlanılması barədə qərar qəbul edib.
Rəsmi məlumatlara əsasən, hadisə fevralın 25-də baş verib. ABŞ istiqamətindən gələn kater Kuba ərazi sularına daxil olduqdan sonra sərhəd xidməti əməkdaşları ilə atışma baş verib. Kuba hakimiyyətinin bildirdiyinə görə, hücum edən şəxslər ciddi şəkildə silahlanmış vəziyyətdə olublar.
Kubanın hüquq-mühafizə orqanlarının məlumatına görə, qrupun üzvlərinin üzərində 13 tüfəng, 11 tapança və həmin silahlar üçün təxminən 13 min patron aşkar edilib. Bundan əlavə, saxlanılan şəxslərdən ən azı ikisinin əvvəllər terrorizm ittihamı ilə axtarılan şəxslər siyahısına daxil edildiyi qeyd olunub.
Kubanın qanunvericiliyinə əsasən, bu cinayətlər üzrə təqsirli bilinən şəxsləri 10 ildən 30 ilədək azadlıqdan məhrumetmə cəzası gözləyə bilər. Cinayətlərin ağırlığından və sübut olunan faktlardan asılı olaraq bəzi hallarda ölüm cəzasının tətbiqi də istisna edilmir.
Kuba Daxili İşlər Nazirliyi tərəfindən aparılan araşdırmalar nəticəsində hadisənin təşkilatçısının ABŞ-də yaşayan və hökumət əleyhinə fəaliyyət göstərən “30 Noyabr Hərəkatı”nın rəhbəri Maritsa Luqo Fernandes olduğu müəyyən edilib. Bildirilir ki, onun iştirakı ilə ABŞ-də yaşayan kubalıların daxil olduğu bir qrup hazırlanıb və Florida ştatında qeydiyyatdan keçmiş kater vasitəsilə fevralın 25-də Kuba ərazi sularına daxil olublar.
Məlumata görə, Kuba sərhədçiləri katerə yaxınlaşdıqda gəmidə olan şəxslər atəş açmağa başlayıblar. Baş verən atışma nəticəsində katerdə olan şəxslərdən dördü öldürülüb, altı nəfər isə yaralanıb. Hadisə zamanı Kuba sərhəd xidmətinin bir əməkdaşı da yaralanıb.
Rəsmi mənbələrin bildirdiyinə görə, saxlanılan şəxslər dindirilmə zamanı terror aktı törətmək niyyətində olduqlarını etiraf ediblər. Hadisə ilə bağlı araşdırmalar davam edir və Kuba hakimiyyəti bunu ölkənin təhlükəsizliyinə qarşı təşkil olunmuş təxribat kimi qiymətləndirir.
Poliqon.info
