Qeyd edək ki, Şimali Koreyanın donanmasını gücləndirmək üçün son səyləri diqqətəlayiqdir. Bu yaxınlarda təqdim edilən "Çoe Hyon" esminesi Pxenyanın dəniz gücünü modernləşdirmək proqramının əsas elementi kimi qəbul edilir. Gəmi uzaqmənzilli qanadlı raketlər, hava hücumundan müdafiə sistemləri və qabaqcıl radar texnologiyası ilə təchiz olunub. Raket sınağını müşahidə edən Kim Çen In bildirib ki, donanmanın qarşısını alma qabiliyyətinin artırılması ölkənin müdafiə strategiyasında mühüm rol oynayır. O, xüsusilə də dənizdən uzaqmənzilli hücum imkanlarının inkişaf etdirilməsinin Şimali Koreyanın təhlükəsizliyi üçün çox vacib olduğunu qeyd edib. Analitiklər Pxenyanın bu addımının təkcə regional deyil, həm də qlobal təhlükəsizlik balansları baxımından diqqətlə izlənildiyini bildirirlər. ABŞ və İran arasında davam edən müharibənin beynəlxalq gərginliyi artırdığı bir vaxtda keçirilən bu sınaq Şimali Koreyanın hərbi qabiliyyətlərini nümayiş etdirmək və "Mən də burdayam" mesajı göndərmək cəhdi kimi qiymətləndirilir.
Ekspertlərin fikrincə, Şimali Koreya son aylarda həm ballistik, həm də qanadlı raketlərin sınaqlarını artırmaqla hərbi qüdrətini nümayiş etdirir.
