ain.az, Azertag portalına istinadən məlumat verir.
Mingəçevir, 5 mart, AZƏRTAC
Gənclər və İdman Nazirliyi və Azərbaycan Pauerliftinq Federasiyasının birgə təşkilatçılığı ilə keçirilən Pauerliftinq və Benç-press üzrə Azərbaycan Çempionatında Mingəçevir Dövlət Universitetinin nümayəndələri uğurlu nəticələr əldə ediblər.
AZƏRTAC-ın bölgə müxbirinin verdiyi məlumata görə, universitetin məşqçi-müəllimi Mehman Baxışov, tələbələr Vaqif Əhmədli və Şamil Daşdəmirov çempionatda yüksək idman göstəriciləri nümayiş etdiriblər. Yarışların nəticələrinə əsasən, məşqçi-müəllim Mehman Baxışov master kateqoriyasında I yerə, tələbə Vaqif Əhmədli gənclər arasında I yerə, Şamil Daşdəmirov isə III yerə layiq görülüb. Uğurlu çıxış edən MDU nümayəndələri çempionatın təşkilatçıları tərəfindən medal və diplomlarla təltif olunublar.
Qazanılan nailiyyətlər Mingəçevir Dövlət Universitetində də yüksək qiymətləndirilib. Mingəçevir Dövlət Universitetinin Elmi Şurasının növbəti iclasında məşqçi-müəllim Mehman Baxışov Şuranın qərarına əsasən mükafatlandırılıb. Çempionatda uğur qazanan tələbələr də universitetin Həmkarlar İttifaqı Komitəsi tərəfindən mükafata layiq görülüb, onların idman sahəsində əldə etdikləri nəticələr xüsusi olaraq qeyd olunub. Həmçinin Mingəçevir Dövlət Universitetinin “Sosial iş” ixtisasının I kurs tələbəsi Nazpəri Cabbarova kikboksinq üzrə keçirilən Azərbaycan çempionatında çempion adını qazanıb. Onun bu uğuru da universitet rəhbərliyi tərəfindən yüksək qiymətləndirilib və Nazpəri Cabbarova Mingəçevir Dövlət Universitetinin Həmkarlar İttifaqı Komitəsi tərəfindən mükafatlandırılıb.
Qeyd edək ki, Mingəçevir Dövlət Universitetində tələbələrin idman fəaliyyətinin dəstəklənməsi, sağlam həyat tərzinin təşviqi və universitetin müxtəlif idman növlərində ölkə miqyasında uğurla təmsil olunması istiqamətində mütəmadi tədbirlər həyata keçirilir. Əldə olunan bu nəticələr MDU tələbələrinin və müəllimlərinin idman potensialının və universitetdə formalaşan sağlam idman mühitinin bariz göstəricisidir.
Müxbir - Vüsalə Cənnətova
Ən son xəbərləri və yenilikləri almaq üçün ain.az saytını izləyin.
