Azərbaycanda avtomobil, dəmir yolu, metro, tramvay, dəniz və hava nəqliyyatı daxil olmaqla bütün nəqliyyat növləri üzrə avtonom nəqliyyat vasitələrinin tətbiqi üçün normativ hüquqi, texnoloji və institusional bazanın yaradılması və mərhələli tətbiqinin təmin edilməsi nəzərdə tutulub.
Bəs Azərbaycanın yol infrastrukturu avtonom sistemlərinin tətbiqi üçün uyğundurmu?
Mövzu ilə bağlı Pravda.az-a açıqlama verən yol hərəkəti üzrə ekspert-hüquqşünas Ərşad Hüseynovun sözlərinə görə, bu mövzu ətrafında səsləndirilən fikirlər əslində gələcəyin məsələləridir, çünki Azərbaycanda sürücüsüz avtomobillərin hərəkəti üçün xeyli iş görülməlidir: “Hüquqi məsələlər, şərtləri, qaydaları müəyyən olunmalıdır. Ancaq kimsə otaqda oturub işləməklə deyil, praktik məsələlər nəzərə alınmalıdır. İdarəolunma, yollarda digər hərəkət iştirakçıları ilə münasibətlər və s. araşdırılmalıdır. Dünyada avtonom avtomobillərin proqram təminatının özünə dair ciddi tələbləri var. Orada texniki və hüquqi məsələlər mövcuddur. Bunlar hamısı həll olunmalıdır. Bügünkü infrastrukturumuz ona cavab vermir. Hətta cavab verməkdən çox uzaqdır. Sürücüsüz avtomobillərin yollarda, küçələrdə hərəkət etməsi üçün yol hərəkətinin təşkili ideal vəziyyətdə olmalıdır. İdeala yaxın deyil, məhz ideal formada olmalıdır. Həm də bu, beynəlxalq aləmdə qəbul olunmuş yol hərəkətlərinin təşkili standartları, texniki vasitələri (yoldakı xətlər, işıqfor, parklanma yeri və s.) kimi parametrlər üzrə dünyada mövcud olan hər şeyə uyğun olmalıdır. Çünki həmin maşınları istehsal edənlər bu proqramla idarəetmə sistemi yaradırlar. Bunun üçün də həddindən artıq çox işlər görülməlidir. Hazırda Azərbaycan yollarında ən böyük problem elə hərəkətin təşkilidir. Ona görə bu məsələdən hələ xeyli uzaqdayıq”.
Şəhanə Quliyeva
