Alimlər mikrobların təsiri ilə ağciyərlərin allergiyaya qarşı müqaviməti arasında əlaqə aşkar ediblər. Onların fikrincə, bu əlaqə gözlənilməzdir.
"Cebheinfo.az" xəbər verir ki, araşdırma "Nature Immunology" jurnalında dərc olunub.
O göstərir ki, bakteriya və ya virusların hətta çox kiçik hissəcikləri belə ağciyər toxumasını bir neçə ay ərzində allergik reaksiyalara qarşı “hazırlaya” bilir.
İnkişaf etmiş ölkələrdə allergiya və astma hallarının artması uzun müddətdir alimləri düşündürür. Tədqiqatçılar bəzi insanların allergiyaya meyilli olmasının səbəbini öyrənmək üçün yeni araşdırma aparmağı hədəfləyirlər.
Mövcud fərziyyələrdən birinə görə, insanın erkən yaşlarda mikroorqanizmlərlə təması immun sisteminin düzgün formalaşmasına kömək edir. Lakin bu təsirin konkret mexanizmi indiyə qədər tam aydın deyildi.
Yeni araşdırmada alimlər siçanlar üzərində bir sıra təcrübələr aparıblar. Heyvanların ağciyərləri bakteriya və virusların kiçik fraqmentlərinə məruz qoyulub. Bu fraqmentlər orqanizmin infeksiyalara qarşı təbii müdafiə reaksiyası sayılan birinci tip immun cavabı aktivləşdirir.
Daha sonra heyvanlar allergenlə təmasda olduqda, onların orqanizmi demək olar ki, reaksiya verməyib. Bundan əlavə, əgər mikrobların fraqmentləri ilə təmas əvvəlcədən baş verirdisə, qoruyucu təsir üç aydan çox müddət davam edib.
