İranın keçmiş şah ailəsinin nümayəndəsi Rza Pəhləvi ərəb ölkələrinə müraciət edərək İran xalqına dəstək göstərməyə çağırıb. O, həmçinin mümkün siyasi dəyişikliklərdən sonra İranla əməkdaşlığa hazır olmağın vacibliyini vurğulayıb.
NOCOMMENT.az xəbər verir ki, İranın keçmiş vəliəhd şahzadəsi Rza Pəhləvi ərəb dövlətlərinə müraciət edərək onları İran xalqını dəstəkləməyə və ölkədə mövcud rejimin mümkün süqutundan sonra formalaşa biləcək keçid hökuməti ilə əməkdaşlığa hazırlaşmağa çağırıb.
O bildirib ki, region ölkələrinə qarşı həyata keçirilən raket hücumları İran hakimiyyətinin əsl mahiyyətini nümayiş etdirir. Pəhləvinin sözlərinə görə, bu hücumlar hazırkı hakimiyyətin Yaxın Şərqdə sabitliyin pozulmasında oynadığı rolu bir daha göstərir.
Keçmiş şahzadə qeyd edib ki, xüsusilə Birləşmiş Ərəb Əmirlikləri, Bəhreyn, Qətər və Səudiyyə Ərəbistanı kimi ölkələrə qarşı həyata keçirilən raket hücumları region üçün ciddi təhlükə yaradır və bu hadisələr İran hakimiyyətinin siyasətinin nəticəsidir.
Rza Pəhləvi hesab edir ki, region ölkələri İran xalqının yanında dayanmalı və gələcəkdə ölkədə baş verə biləcək siyasi dəyişikliklər fonunda yeni hakimiyyətlə əməkdaşlıq imkanlarını nəzərdən keçirməlidirlər. Onun fikrincə, İran xalqının dəstəklənməsi regionda sabitliyin bərpası baxımından mühüm rol oynaya bilər.
Aytən
