Almaniya kansleri Fridrix Mertsin Vaşinqton səfərindən sonra Berlin və Madrid arasında qəribə diplomatik insident yaşanıb.
Musavat.com xəbər verir ki, bu barədə nüfuzlu Politico nəşri məlumat yayıb.
Məlumata görə, ABŞ prezidenti Donald Trampla görüşdən sonra Almaniya kansleri Fridrix Merts İspaniyanın baş naziri Pedro Sançes ilə telefonla danışmağa çalışsa da, onunla əlaqə saxlaya bilməyib.
Bu barədə Politico-ya kanslerin mətbuat katibi Ştefan Kornelius məlumat verib. Onun sözlərinə görə, Merts Sançesə iki dəfə zəng etməyə cəhd edib, lakin əlaqə baş tutmayıb.
Kornelius bildirib ki, kansler hətta Sançes üçün səsli mesaj da buraxıb və cavab gözləyir.
Bununla belə, Almaniya tərəfi yaranmış vəziyyəti böyütməməyə çalışır. Kanslerin sözçüsü iki ölkə arasında münasibətlərin gərgin olmadığını iddia edib.
O həmçinin qeyd edib ki, Almaniyanın xarici siyasət və təhlükəsizlik məsələləri üzrə yüksək səviyyəli nümayəndəsi Günter Zautter Tramp ilə görüşdən dərhal sonra bu barədə ispan həmkarına məlumat verib.
Lakin Kornelius etiraf edib ki, Vaşinqton səfərindən sonra Merts və Sançes hələ də bir-biri ilə danışmayıblar.
Politico yazır ki, sonradan İspaniya hökumətinin nümayəndəsi məsələyə aydınlıq gətirib. Onun sözlərinə görə, Mertsin zənglərinin cavabsız qalmasının səbəbi texniki problem olub.
Belə ki, Almaniya kansleri artıq istifadə olunmayan köhnə telefon nömrəsinə zəng edib. Bildirilib ki, İspaniyanın baş naziri təhlükəsizlik səbəbləri ilə telefon nömrəsini vaxtaşırı dəyişir.
Sonradan anlaşılmazlıq aradan qaldırılıb və Almaniya tərəfinə Sançesin yeni əlaqə məlumatları təqdim edilib. Buna baxmayaraq, iki lider hələ də telefon danışığı həyata keçirməyib.
Politico qeyd edir ki, bu insident Berlin və Madrid arasında tarixən mövcud olan yaxşı münasibətlər fonunda qeyri-adi görünür. Adətən Almaniya kanslerləri və İspaniya baş nazirləri siyasi baxışlarından asılı olmayaraq sıx əlaqələr saxlayıblar.
Buna baxmayaraq, Almaniya xarici işlər naziri Yohan Vadeful iki ölkənin hələ də yaxın müttəfiq olduğunu və Berlinin ABŞ prezidenti Trampın tarif təhdidləri qarşısında Madridi dəstəklədiyini bildirib.
Politico yazır ki, gərginliyin əsas səbəblərindən biri Trampın İspaniya hökumətinə qarşı sərt bəyanatları olub.
Belə ki, ABŞ prezidenti bir həftə əvvəl İspaniya hökumətini “dəhşətli hökumət” adlandırıb və Madridə qarşı ticarət əlaqələrini kəsməklə hədələyib.
Tramp bu açıqlamaları İspaniyanın ABŞ hərbi təyyarələrinə öz hərbi bazalarından istifadə etməyə icazə verməməsi fonunda səsləndirib. Vaşinqton həmin bazalardan İrana zərbələr üçün istifadə etmək istəyirdi.
Bundan əlavə, Tramp İspaniyanı NATO çərçivəsində müdafiə xərclərini ÜDM-in 5 faizi səviyyəsinə qaldırmaqdan imtina etdiyinə görə də tənqid edib.
Politico yazır ki, bütün bunlar Madriddə ciddi narazılıq yaradıb. İspaniya rəhbərliyi xüsusilə Mertsin Ağ Evdə keçirilən mətbuat konfransı zamanı Trampın İspaniyaya yönəlmiş tənqidlərinə reaksiya verməməsindən narazı qalıb.
İspaniyanın baş nazir müavini Yolanda Dias Politico-ya verdiyi müsahibədə Mertsi açıq şəkildə tənqid edib.
Onun sözlərinə görə, bəzi Avropa liderləri hazırkı tarixi mərhələnin məsuliyyətini dərk etmirlər.
“Bu gün Avropaya liderlik lazımdır, Trampa sədaqət nümayiş etdirən vassallar yox”, – deyə Dias bildirib.
Fridrix Merts isə Ağ Evdə keçirilən mətbuat konfransından sonra bildirib ki, o, Trampa açıq etiraz etməməsinin səbəbi vəziyyəti daha da gərginləşdirmək istəməməsi olub.
Beləliklə, Politico-nun qeyd etdiyi kimi, kiçik görünən telefon insidenti əslində Avropa daxilində Trampın siyasəti fonunda yaranan yeni siyasi gərginliyin də göstəricisinə çevrilib.
Musavat.com
