ain.az, Azertag portalına istinadən məlumat yayır.
Stokholm, 11 mart, Nərgiz Cəfərli, AZƏRTAC
“Əvvəlcə güldürən, sonra düşündürən” tədqiqatlarına görə mükafatları ilə tanınan Şnobel mükafatı son 35 ildə ilk dəfə ABŞ-dən Avropaya köçürüləcək.
AZƏRTAC xəbər verir ki, bu il mərasim sentyabrın 3-də İsveçrənin Sürix Universitetində keçiriləcək.
Mükafatın təsisçisi Mark Abrahams bildirib ki, təşkilatçılar xarici qonaqlar üçün risklərin artması səbəbindən laureatlar və jurnalistlərdən ABŞ-yə gəlmələrini xahiş edə bilməzlər. Onun sözlərinə görə, ötən il ilk dəfə olaraq bir neçə qalib mərasimdə iştirak etməkdən imtina edib.
Təşkilatçılar qeyd edirlər ki, Sürix tez bir zamanda tədbirə ev sahibliyi etməyə razılıq verib. Gələcəkdə mərasimin cüt illərdə dünyanın əsas maliyyə mərkəzlərindən birində, tək illərdə isə digər Avropa şəhərlərində keçirilməsi planlaşdırılır.
Şnobel mükafatı 1991-ci ildə təsis edilib və hər il on kateqoriya üzrə verilir. Keçən ilin qalibləri arasında üfunət qoxan ayaqqabı rəfi (“mühəndislik dizaynı”), elmi cəhətdən mükəmməl makaron sousu (“fizika”), spirtli içkilərin dil qabiliyyətinə təsiri (“sülh mükafatı”), zebr zolaqlarının inəkləri milçəklərdən necə müdafiə etdiyinə dair araşdırma (“biologiya”) və narsisistik xüsusiyyətlərə malik insanların onlara ağıllı olduqları deyildikdə reaksiyası (“psixologiya”) olub.
Nərgiz Cəfərli
AZƏRTAC-ın xüsusi müxbiri
Stokholm
Hadisənin gedişatını izləmək üçün ain.az saytında ən son yeniliklərə baxın.
