Səudiyyə Ərəbistanı Hərbi Hava Qüvvələri İrandan ölkə ərazisinə doğru atılan yeddi ballistik raketi müvəffəqiyyətlə zərərsizləşdirib.
AFN.az yerli mediaya istinadən xəbər verir ki, krallığın Müdafiə Nazirliyinin yaydığı məlumata görə, hava hücumundan müdafiə sistemləri əsasən "Şahzadə Sultan" aviabazasını və ölkənin şərq bölgəsini hədəf alan zərbələrin qarşısını alıb.
Rəsmi mənbələr bildirir ki, raketlərdən altısı birbaşa Əl-Xərc əyalətində yerləşən və ABŞ hərbçilərinin də istifadə etdiyi "Şahzadə Sultan" aviabazasına yönəldilib. Digər bir ballistik raket isə ölkənin strateji əhəmiyyətli Şərq vilayətinə (Eş-Şərkiyə) doğru atılsa da, havada məhv edilib.
Nazirlik həmçinin həmin vaxt bölgədə bir neçə dronun da vurulduğunu qeyd edib. Bu əməliyyat Səudiyyə Ərəbistanının hava hücumundan müdafiə potensialının regiondakı təhdidlərə qarşı hazırlıqlı olduğunu göstərir. İran tərəfi hələlik raket buraxılışları ilə bağlı rəsmi bəyanat yaymayıb.
