Şimali Koreya lideri hərbi müəssisədə yeni yerli istehsal tapançadan atəş açaraq onun xüsusiyyətlərini şəxsən yoxlayıb...
Koreya Xalq Demokratik Respublikasının (KXDR) lideri Kim Çen In ölkənin müdafiə sənayesi müəssisələrindən birinə səfər edərək yeni hazırlanmış tapançanın sınaqlarında iştirak edib.
Poliqon xəbər verir ki, bu barədə Pxenyanda fəaliyyət göstərən Koreya Mərkəzi Teleqraf Agentliyi (KCNA) məlumat yayıb və səfərlə bağlı fotolar dərc edib.
Məlumata görə, Kim Çen In müəssisəyə qızı ilə birlikdə gəlib və onu Koreya Əmək Partiyasının Mərkəzi Hərbi Komissiyasının üzvləri müşayiət ediblər. Səfər zamanı Şimali Koreya liderinə yerli istehsal olan yeni tapançanın hazırlanması və istehsal prosesi barədə ətraflı məlumat verilib. Partiyanın rəhbər heyəti ilə birlikdə müəssisədə aparılan işlərin gedişi ilə tanış olan Kim Çen In yeni silah modelinin xüsusiyyətləri ilə maraqlanıb.
Bildirilir ki, dövlət başçısı daha əvvəl müdafiə nazirliyi və Baş Qərargah tərəfindən təqdim edilən hesabatla tanış olub və həmin hesabatda yeni tapançanın taktiki-texniki göstəricilərinin yüksək qiymətləndirildiyi qeyd edilib. Buna baxmayaraq, Kim Çen In silahın imkanlarını şəxsən yoxlamaq qərarına gəlib və zavodun atış poliqonuna yollanıb.
Poliqonda Şimali Koreya lideri yeni tapança ilə hədəflərə atəş açaraq silahın dəqiqliyini və digər texniki xüsusiyyətlərini sınaqdan keçirib. Məlumata görə, sınaqlarda onun qızı, həmçinin səfərdə iştirak edən yüksək rütbəli hərbçilər və dövlət rəsmiləri də iştirak ediblər. Atışlardan sonra Kim Çen In silahın hazırlanması və istehsalından razı qaldığını bildirib və layihə üzərində çalışan rəhbər şəxslərə, mühəndislərə və zavod kollektivinə təşəkkür edib.
Kim Çen In çıxışında ölkənin aparıcı hərbi-sənaye müəssisələrinin texniki təchizat səviyyəsinin ciddi şəkildə artırılmasının vacibliyini vurğulayıb. O bildirib ki, silah istehsalında keyfiyyətə nəzarət mexanizmləri gücləndirilməli, həm istehsalat mədəniyyəti, həm də əmək şəraiti daha inkişaf etmiş səviyyəyə qaldırılmalıdır.
Şimali Koreya lideri həmçinin ölkənin hərbi sənaye müəssisələrinin modernləşdirilməsi ilə bağlı yeni beşillik planın hazırlandığını qeyd edib. Onun sözlərinə görə, üç mühüm müdafiə zavodunun modernləşdirilməsi üçün nəzərdə tutulan layihə və büdcə planı apreldə Koreya Əmək Partiyasının Mərkəzi Hərbi Komissiyasının geniş iclasında müzakirəyə çıxarılacaq.
Poliqon.info
