ABŞ Müdafiə Nazirliyi (Pentaqon) Konqresə təqdim etdiyi gizli hesabatda İranla davam edən hərbi əməliyyatların rəsmi maliyyə bədəlini açıqlayıb.
Musavat.com xəbər verir ki, "The New York Times"ın (NYT) məlumatına görə, çərşənbə axşamı Kapitolidə keçirilən qapalı brifinqdə qanunvericilərə döyüşlərin ilk altı gününün büdcəyə 11,3 milyard dollardan baha başa gəldiyi bildirilib. Qeyd olunur ki, bu məbləğ yalnız aktiv döyüş əməliyyatlarını, sərf olunan raketləri, aviasiya yanacağını və hərbi texnikanın cari təmirini əhatə edir.
Təqdim olunan 11,3 milyard dollarlıq ilkin qiymətləndirməyə müharibədən əvvəl həyata keçirilən genişmiqyaslı qoşun yığılması, hərbi personalın regiona daşınması və texnikanın yerləşdirilməsi xərcləri daxil edilməyib. Bu səbəbdən konqresmenlər birinci həftənin ümumi xərcinin hesablanması başa çatdıqdan sonra rəqəmin əhəmiyyətli dərəcədə artacağını gözləyirlər.
Ekspertlər bu sənədi indiyədək Konqresə təqdim olunan ən dolğun və sistemli maliyyə təhlili adlandırırlar. Lakin sənəddə SEPAH-ın Bəhreyndəki 5-ci Donanma qərargahına və Küveytdəki bazalara endirdiyi zərbələr nəticəsində məhv edilən bahalı rabitə sistemlərinin ("Vantor" kəşfiyyatının qeyd etdiyi 200 milyon dollarlıq infrastruktur ziyanı) tam bərpa xərclərinin necə əks olunduğu hələlik qeyri-müəyyəndir.
Bu rəqəmlərin açıqlanması Vaşinqtonda ciddi müzakirələrə səbəb olub. Donald Trampın əməliyyatı "kiçik ekskursiya" adlandırmasına baxmayaraq, gündəlik 1,8 milyard dollarlıq hərbi xərc bəzi senatorların bu "ekskursiyanın" ABŞ iqtisadiyyatı üçün uzunmüddətli fəsadları barədə narahatlığını artırıb.
Maliyyə analitiklərinin fikrincə, İranın Hörmüz boğazındakı blokadası davam edərsə, ABŞ-ın birbaşa və dolayı itkiləri yüz milyardlarla dolları keçə bilər.
Musavat.com
