İranın hərbi qurumu region sakinlərindən ABŞ hərbçilərinin yerləşdiyi məkanlar barədə məlumatların Tehrana ötürülməsini istəyib...
Poliqon xəbər verir ki, bu barədə İranın Tasnim Agentliyi məlumat yayıb. Məlumata görə, İran İslam İnqilabı Keşikçiləri Korpusu (SEPAH) kəşfiyyat strukturları ərəb ölkələrinin vətəndaşlarına müraciət edərək ABŞ hərbçilərinin yerləşdiyi yerlər barədə məlumatların İran tərəfinə ötürülməsini istəyib.
SEPAH-ın kəşfiyyat idarəsinin açıqlamasında iddia olunur ki, ABŞ hərbi qüvvələri Yaxın Şərqdə yerləşdirilən kontingentin bir hissəsini mülki obyektlərdə yerləşdirir və bununla region sakinlərini “canlı qalxan” kimi istifadə etməyə çalışır.
İran hərbi qurumunun məlumatına görə, hazırda ABŞ-nin təxminən 11 min hərbçisi Yaxın Şərq regionunun müxtəlif ölkələrində yerləşən otellərdə və yaşayış evlərində məskunlaşıb. SEPAH nümayəndələri iddia edirlər ki, bu üsul ABŞ qüvvələrinin yerləşdiyi obyektlərin hərbi hədəf kimi müəyyənləşdirilməsini çətinləşdirmək məqsədi daşıyır.
Açıqlamada bildirilib ki, region sakinləri ABŞ hərbçilərinin yerləşdiyi məkanlar barədə əldə etdikləri məlumatları İran tərəfinə ötürə bilər. SEPAH bu məlumatların regiondakı təhlükəsizlik vəziyyətinin qiymətləndirilməsi üçün vacib olduğunu qeyd edib.
Ekspertlər isə hesab edirlər ki, bu cür çağırışlar Yaxın Şərqdə onsuz da gərgin olan təhlükəsizlik mühitini daha da mürəkkəbləşdirə bilər. Regionda ABŞ hərbi bazalarının və koalisiya qüvvələrinin mövcudluğu fonunda informasiya müharibəsi və qarşılıqlı ittihamlar da artır.
Son dövrlərdə ABŞ ilə İran arasında hərbi və siyasi qarşıdurmanın güclənməsi Yaxın Şərqdə gərginliyi daha da artırıb. Bu fonunda tərəflərin kəşfiyyat və informasiya fəaliyyətlərini genişləndirməsi regiondakı təhlükəsizlik vəziyyətinə ciddi təsir göstərə bilər.
Poliqon.info
