Donald Trampın administrasiyası “Cons” Qanununun müvəqqəti olaraq dayandırılmasını nəzərdən keçirir.
“Cebheinfo.az” xəbər verir ki, bu barədə “Bloomberg” məlumat yayıb.
Qeyd edilir ki, “Cons” Qanununa əsasən, ABŞ limanları arasında hərəkət edən hər hansı yük yalnız ABŞ-da istehsal olunmuş, ABŞ bayrağı altında üzən və ABŞ vətəndaşlarından ibarət heyətlə daşınmalıdır.
Məlumata görə, 30 günlük güzəşt neft, benzin, dizel, mayeləşdirilmiş təbii qaz və gübrə daşınmalarına şamil edilə bilər.
“Milli müdafiə maraqları naminə Ağ Ev vacib enerji resurslarının maneəsiz təchizatını təmin etmək üçün Cons Qanunundan müvəqqəti olaraq imtina etməyi nəzərdən keçirir”- Ağ Evin mətbuat katibi Kerolayn Livit belə deyib.
Agentlik əlavə edir ki, bu tədbir İrandakı müharibə ilə bağlı neft və benzin qiymətlərinin kəskin artması fonunda nəzərdən keçirilir.
Qanunun icrasının dayandırılması Şərq Sahili sürücüləri üçün yanacaq qiymətlərinin hər qallonunu təxminən 10 sent azalda bilər.
Ekspertlər xəbərdarlıq edirlər ki, təsir məhdud ola bilər və bu təşəbbüs gəmiqayırma sənayesi və onun Konqresdəki tərəfdarlarının siyasi müqavimətilə qarşılana bilər.
