İsrail İran istehsalı pilotsuz uçuş aparatlarına (PUA) qarşı mübarizə məsələsində Ukrayna ilə əməkdaşlığı dərinləşdirmək istəyir.
Bu barədə "Ynet" məlumat yayıb.
Məlumata görə, İsrailin Baş naziri Benyamin Netanyahu bu mövzuda Ukrayna Prezidenti Volodimir Zelenski ilə telefon danışığı aparmaq üçün müraciət edib. Ukraynanın İsraildəki səfiri Yevgeni Kornıyçuk belə bir sorğunun Kiyevə daxil olduğunu təsdiqləsə də, tərəflərin hələ danışmadığını bildirib.
Diplomatın sözlərinə görə, telefon danışığının yaxın günlərdə baş tutacağı gözlənilir. O əlavə edib ki, Ukrayna İranla qarşıdurma məsələsində İsraili dəstəkləyir və iki ölkənin xüsusi xidmət orqanları arasında əməkdaşlıq davam edir.
