Rusiya və Ukrayna arasında aparılan qeyri-rəsmi danışıqlarda son aylarda müəyyən “irəliləyiş” əldə olunduğu bildirilsə də, tərəflər arasında ciddi fikir ayrılıqları qalmaqdadır.
Danışıqlarda iştirak edən mənbələrdən biri bildirib ki, Moskva yaxın vaxtlarda yeni danışıqlara maraq göstərmir:
“Düşünmürəm ki, ruslar tezliklə yenidən danışıqlar aparmaq istəyirlər. Çünki hazırda danışılacaq ciddi bir məsələ yoxdur”.
Avropa İttifaqı liderləri hesab edir ki, Rusiyaya əlavə təzyiq göstərilmədən sülh danışıqlarının nəticə verməsi çətin olacaq.
Məlumata görə, Friedrix Merz ABŞ və İsrailin İrana hücumundan üç gün sonra Vaşinqtona səfər edərək Ağ Evdə görüş keçirib. O, Rusiyaya qarşı təzyiqin artırılmasının vacibliyini əsaslandırmaq üçün müxtəlif xəritə və diaqramlar təqdim edib.
Lakin danışıqlarla tanış olan mənbələrin sözlərinə görə, Donald Tramp bu məsələni ətraflı müzakirə etməkdən çəkinib və Rusiyanın daha güclü, Ukraynanın isə zəif mövqedə olduğunu düşündüyünü bildirib. Həmçinin ABŞ-ın Moskva üzərində təzyiqi artırmağa hazır olduğuna dair hər hansı ciddi siqnal müşahidə olunmayıb.
İki Aİ diplomatı son bir həftə ərzində ABŞ rəsmilərinin avropalı həmkarlarına Rusiyanın neft sənayesinə qarşı əlavə sanksiyaların tətbiq olunmayacağını bildirdiyini qeyd edib.
Ukraynanın yüksək vəzifəli rəsmisi isə bildirib ki, Moskva Kiyevin qəbul edə bilməyəcəyi tələblərdə israr etdiyinə görə Rusiya müharibəni bitirməkdə “ciddi görünmür”.
Rəsmi əlavə edib ki, Vaşinqtonun diqqətinin İran məsələsinə yönəlməsi Rusiya ilə danışıqların tamamilə pozulacağı anlamına gəlmir və Kiyev “vəziyyətin necə inkişaf edəcəyini izləyəcək”.
ABŞ prezidenti Donald Tramp daha əvvəl Ukrayna prezidenti Volodimir Zelenski barədə danışaraq onun sülh razılaşmasının əldə olunmasına maneə olduğunu iddia etmişdi. Tramp həmçinin Vladimir Putinin müharibəyə son qoymaq üçün danışıqlara hazır olduğunu bildirmişdi.
Onun sözlərinə görə, Rusiya və Ukrayna bir neçə dəfə sülh sazişinə yaxın olsalar da, hər dəfə tərəflərdən biri son anda geri çəkilib.
