Baş nazir Kir Starmer ABŞ prezidentinin çağırışına baxmayaraq bölgəyə əlavə hərbi qüvvə göndərməyəcəyini bildirib...
Poliqon xəbər verir ki, Böyük Britaniyanın baş naziri Kir Starmer Hörmüz boğazında gəmiçilik fəaliyyətinin bərpası üçün bölgəyə hərbi gəmilər göndərməkdən imtina edib. Bu qərar ABŞ prezidenti Donald Trampın müttəfiqlərə müraciət edərək boğazda təhlükəsizliyi təmin etmək və artan iqtisadi böhranın qarşısını almaq üçün əlavə qüvvələr göndərməyə çağırmasından sonra verilib.
Məlumata görə, Vaşinqton regionda təhlükəsiz gəmiçilik marşrutlarının qorunması və enerji tədarükünün fasiləsizliyinin təmin edilməsi məqsədilə müttəfiq ölkələrin hərbi dəstəyinə ümid edirdi. Hörmüz boğazı dünya neft ticarətinin mühüm hissəsinin keçdiyi strateji marşrutlardan biri hesab olunur.
Lakin Britaniya hökuməti bölgəyə əlavə hərbi gəmilər göndərmək planının hazırda gündəmdə olmadığını bildirib. Rəsmi London hesab edir ki, vəziyyətin daha da gərginləşməsinin qarşısını almaq üçün diplomatik yolların araşdırılması və regional sabitliyin qorunması prioritet olmalıdır.
Analitiklərin fikrincə, Böyük Britaniyanın bu mövqeyi Yaxın Şərqdə artan hərbi gərginlik fonunda Avropa ölkələrinin ehtiyatlı siyasət yürütməyə çalışdığını göstərir. Ekspertlər hesab edirlər ki, Hörmüz boğazında mümkün hərbi eskalasiya qlobal enerji bazarına və beynəlxalq ticarətə ciddi təsir göstərə bilər.
Poliqon.info
