Bakı. TurkicWorld:
DOST İnklüziv İnkişaf və Yaradıcılıq Mərkəzinin Qarabağ DOST Evi filialına növbəti qəbul prosesi keçirilib. Bərdə rayonu və Tərtər şəhəri üzrə müraciət edən həssas əhali qruplarına aid 43 vətəndaşın bacarıqları Qiymətləndirmə Komissiyası tərəfindən nəzərdən keçirilib.
TurkicWorld xəbər verir ki,yaradıcılıq potensialı müsbət qiymətləndirilən 40 nəfər müəssisədə müxtəlif fəaliyyət istiqamətləri üzrə təlimlərə cəlb edilib. Bununla da Bərdədəki Qarabağ Regional DOST Mərkəzində fəaliyyət göstərən filialın ümumi benefisiar sayı 106 nəfərə çatıb.
Onlar xalçaçılıq, toxuma və tikmə, floristika, təsviri incəsənət, bədii oyma, kulinariya və musiqi istiqamətləri üzrə peşəkar təlimlərdə iştirak edərək öz bacarıqlarını təkmilləşdirirlər. Benefisiarlar həmçinin fəal şəkildə müxtəlif sərgi və konsert layihələrində çıxış edərək yaradıcılıqlarını nümayiş etdirirlər.
Qarabağ “DOST Evi”nin xidmətlərindən əlilliyi olan şəxslər, şəhid ailələrinin üzvləri, müharibə ilə əlaqədar əlilliyi olan şəxslər və onların övladları, valideynlərini itirmiş və ya valideyn himayəsindən məhrum olmuş uşaqlar, aztəminatlı ailələrin üzvləri yararlana bilərlər.
Qəbul üçün DOST mərkəzləri və ya Sosial Xidmətlər Agentliyinin yerli nümayəndəliklərinə müraciət etmək kifayətdir. Mərkəzin rəsmi sosial media hesabları və ya "142" Çağrı Mərkəzi vasitəsilə əlavə məlumat almaq olar.
