Səudiyyə Ərəbistanı Müdafiə Nazirliyi ölkənin hava məkanında bir ballistik raket və 15 pilotsuz uçuş aparatının (PUA) vurulduğunu açıqlayıb.
AFN.az xəbər verir ki, nazirliyin sosial media hesabından verilən bəyanatda ölkənin şərq bölgəsinə yönəlmiş yeni PUA hücumlarının qarşısının uğurla alındığı bildirilib. Açıqlamada 15 pilotsuz uçuş aparatının hava hücumundan müdafiə sistemləri tərəfindən məhv edildiyi qeyd olunsa da, həmin aparatların hansı mənbədən idarə olunduğu barədə məlumat verilməyib.
Eyni zamanda, Səudiyyə Ərəbistanının cənub-şərqində yerləşən Əl-Xarc vilayətinə doğru bir ballistik raketin hərəkətinin təsbit edildiyi və həmin raketin də müdafiə sistemləri vasitəsilə zərərsizləşdirildiyi vurğulanıb. Müdafiə raketinin bəzi hissələrinin Şahzadə Sultan Hava Bazası yaxınlığına düşdüyü, lakin hər hansı ciddi dağıntı və ya xəsarətə səbəb olmadığı ifadə edilib.
Digər tərəfdən, Səudiyyə Ərəbistanı Mülki Müdafiə Müdirliyi hücum təhlükəsi ilə əlaqədar ölkənin cənub-şərqindəki Əl-Xarc vilayətində həyəcan siqnallarının çalındığı barədə məlumat yayıb.
