Brent markalı neft 110 dollara yaxınlaşsa da, ticarəti 107,38 dollar səviyyəsində başa vurub...
Qlobal enerji bazarlarında müşahidə olunan gərginlik fonunda Brent markalı neftin qiyməti kəskin yüksələrək gün ərzində demək olar ki, 110 dollar həddinə çatıb.
Poliqon xəbər verir ki, bu barədə Financial Times nəşri məlumat yayıb.
Məlumata görə, ticarət sessiyasının sonunda Brent nefti bir barel üçün 107,38 dollar səviyyəsində qərarlaşıb ki, bu da əvvəlki göstərici ilə müqayisədə 3,8 faiz artım deməkdir. Analitiklər bildirirlər ki, qiymət artımı əsasən Yaxın Şərqdəki geosiyasi risklər və enerji infrastrukturlarına yönəlmiş hücumlarla bağlı narahatlıqlardan qaynaqlanır.
Eyni zamanda, Avropada təbii qaz qiymətləri də əhəmiyyətli dərəcədə yüksəlib. Belə ki, qazın qiyməti 6 faiz artaraq 1 meqavat-saat üçün 54 avroya çatıb. Bu artım Avropa enerji bazarlarında təchizat risklərinin gücləndiyini göstərir.
Ekspertlər qeyd edirlər ki, enerji qiymətlərindəki bu artım yalnız regional deyil, qlobal iqtisadiyyata da təsir göstərə bilər. Xüsusilə enerji idxalından asılı olan ölkələr üçün əlavə inflyasiya təzyiqləri yarana bilər.
Poliqon.info
