ain.az bildirir, Oxumeni.az portalına istinadən.
Özbəkistan ABŞ-a mövsümi kənd təsərrüfatı işçiləri göndərəcək
Miqrasiya Agentliyi Özbəkistan vətəndaşlarının ABŞ-da mövsümi işlərə göndərilməsi barədə razılığa gəlib. Oxuməni.az “Spot.uz”a istinadla xəbər verir ki, bu barədə qurumun mətbuat xidməti məlumat yayıb.
Agentliyin rəhbəri Behzod Musayev ötən həftə USA Farm Labor təşkilatının təsisçisi Manuel Fik ilə onlayn danışıqlar aparıb. Tərəflər H-2A vizası ilə özbəkistanlıların kənd təsərrüfatı işlərinə təşkil olunmuş qaydada cəlb edilməsini müzakirə ediblər.
Agentlikdən bildirilib ki, bu, Amerika tərəfi ilə ilk belə razılaşmadır. Proqram iştirakçıları ABŞ-ın fermalarında və rançolarında 9-10 ay müddətində işləyə biləcəklər. Aylıq əmək haqqı təxminən 3500 dollar təşkil edəcək.
İşəgötürənlər mövsümi işçiləri yaşayış yeri ilə də təmin edəcəklər. İşə qəbul zamanı ixtisaslı mütəxəssislərə üstünlük veriləcək.
Danışıqların yekununda Miqrasiya Agentliyi və USA Farm Labor müvafiq saziş imzalayıblar. Tərəflər həmçinin əməkdaşlığın növbəti mərhələlərini "ən qısa müddətdə" həyata keçirmək barədə razılığa gəliblər.
Yanvar ayında Şavkat Mirziyoyev Özbəkistanın ABŞ-dakı səfiri Furkat Sidikova respublikanın mövsümi işçilərin cəlb olunacağı ölkələr siyahısına daxil edilməsi ilə bağlı danışıqlar aparmağı tapşırıb. Prezident həmçinin bir sıra Avropa ölkələri, Yaponiya və Omanla miqrasiya üzrə hökumətlərarası və idarələrarası sazişlər bağlanması vəzifəsini qoyub.
Mərkəzi Bankın məlumatına görə, 2025-ci ildə özbəkistanlılar ABŞ-dan vətənə 665 milyon dollar göndəriblər ki, bu da ötən illə müqayisədə 15% çoxdur. Eyni zamanda, bu məbləğ sərhədlərarası pul köçürmələrinin ümumi həcmində 3,5%-dən bir qədər çox paya malik olub.
USA Farm Labor – 2003-cü ildə ABŞ-ın fermer təsərrüfatlarına müvəqqəti və mövsümi işçilərin cəlb edilməsi üçün yaradılmış təşkilatdır. Agentlik işəgötürənlərə xarici işçilərin işə götürülməsi üçün müraciətlərin verilməsi, namizədlərin axtarışı, vizaların rəsmiləşdirilməsi və işçilərin yerləşdirilməsi ilə bağlı köməklik göstərir.
Almaz Həsənli
Ən son yeniliklər və məlumatlar üçün ain.az saytını izləyin, biz hadisənin gedişatını izləyirik və ən aktual məlumatları təqdim edirik.
