World Socialist Web Site (WSWS) yazır ki, Türkiyə və bir sıra ərəb ölkələrinin rəsmiləri ABŞ və İsrailin İrana qarşı hərbi əməliyyatlarına siyasi dəstək verən mövqe nümayiş etdirir.
Məlumata görə, martın 18-də Ər-Riyad şəhərində Türkiyə, Bəhreyn, Misir, İordaniya, Küveyt, Livan, Pakistan, Qətər, Səudiyyə Ərəbistanı, Suriya və BƏƏ-nin xarici işlər nazirlərinin iştirakı ilə “İranın aqressiyası məsələsi üzrə ərəb və islam ölkələrinin XİN rəhbərlərinin məsləhət görüşü” keçirilib. Görüşün yekun bəyanatında İranın addımları pislənib.
Nazirlər bəyanatda İranın ABŞ obyektlərinə qarşı hücumlarını qınayaraq bildiriblər ki, bu cür addımlar heç bir halda əsaslandırıla bilməz. Eyni zamanda İrana beynəlxalq hüquqa və qonşuluq prinsiplərinə riayət etmək, eləcə də eskalasiyanı dayandırmaq çağırışı edilib.
WSWS məqaləsində bu bəyanatın reallığı təhrif etdiyi iddia olunur. Nəşr qeyd edir ki, sənəddə ABŞ və İsrailin İrana qarşı hərbi əməliyyatları açıq şəkildə pislənmir, əksinə məsuliyyət İranın üzərinə qoyulur.
Materialda həmçinin bildirilir ki, region ölkələri ABŞ-ın hərbi bazalarından və hava məkanından istifadə etməsinə şərait yaradaraq əməliyyatlara dolayısı ilə dəstək verirlər. Nəşr bu addımların nəticəsində İranın yüksək vəzifəli şəxslərinin öldürüldüyünü, mülki infrastruktura zərbələr endirildiyini və çoxsaylı dinc sakinin həyatını itirdiyini iddia edir.
Məqalədə ABŞ-da keçirilmiş sorğulara da istinad olunur. Bildirilir ki, respondentlərin böyük əksəriyyəti İrana qarşı müharibəni dəstəkləmir və bu müharibə üçün legitim səbəb görmür.
Bundan əlavə qeyd olunur ki, Türkiyə daxilində də münaqişənin genişlənməsi ilə bağlı narahatlıq var. Analizdə bildirilir ki, eskalasiya Ankaranı NATO üzvü kimi müharibəyə cəlb edə, yeni miqrasiya dalğası yarada və regionda geosiyasi balansı dəyişə bilər. Buna baxmayaraq, Türkiyənin reaksiyasının getdikcə ABŞ-ın Yaxın Şərq siyasətinə daha çox uyğunlaşdığı vurğulanır.
