European Commission (Avropa Komissiyası) kiçik və orta hərbi müəssisələrin, eləcə də startapların dəstəklənməsi üçün 115 milyon avro büdcəli AGILE proqramına start verib.
Bu barədə Aİ-nin müdafiə üzrə komissarı Andrius Kubilius Brüsseldə keçirilən mətbuat konfransında məlumat verib.
Onun sözlərinə görə, proqram innovativ hərbi və ikili təyinatlı texnologiyaların inkişafına yönəlib:
“AGILE proqramı pilotsuz uçuş aparatları, kvant texnologiyaları və süni intellekt əsaslı alətlər də daxil olmaqla, sıçrayış xarakterli texnologiyalar üzərində çalışan kiçik və orta müəssisələri və startapları dəstəkləyəcək.”
Kubilius bildirib ki, Avropa Komissiyası bu çərçivədə seçilmiş layihələr üçün 1 milyon avrodan 5 milyon avroya qədər qrantlar təqdim edəcək. Onun sözlərinə görə, maliyyələşdirmə qərarları maksimum 4 ay ərzində veriləcək ki, bu da Avropa bürokratiyası üçün olduqca sürətli hesab olunur.
Qeyd edilib ki, qrantlar konkret layihələrin dəyərinin 100%-nə qədərini əhatə edə bilər və ilk nəticələrin 2027-ci ildə əldə olunacağı gözlənilir.
Komissar əlavə edib ki, Avropa İttifaqında hərbi satınalmaların 70-80%-i iri müdafiə şirkətlərindən həyata keçirilir, halbuki ABŞ-da bu göstərici təxminən 40%-dir. Onun fikrincə, iri şirkətlərdə hərbi istehsal və tədqiqatlar daha çox vaxt və resurs tələb edir.
Kubilius vurğulayıb ki, AGILE proqramı 2028–2034-cü illəri əhatə edən növbəti yeddiillik Aİ büdcəsi çərçivəsində daha geniş miqyasda tətbiq oluna bilər. Eyni zamanda, Aİ ölkələrinin də milli səviyyədə oxşar təşəbbüslər həyata keçirəcəyi gözlənilir.
