Vladimir Putin martın 27-də videokonfrans vasitəsilə Dərbənddə yerləşən Azərbaycan Dövlət Musiqili-Dram Teatrının əsaslı təmirdən sonra yenilənmiş binasının açılışını edəcək.
Azreform.info -ın TASS agentliyinə istinadən məlumatına görə, bu barədə jurnalistlərə Dmitri Peskov bildirib.
Kreml nümayəndəsi qeyd edib ki, bu gün həm də Beynəlxalq Teatr Günü kimi qeyd olunur.
“Prezident bu gün videobağlantı vasitəsilə Dərbənddə Azərbaycan Dövlət Musiqili-Dram Teatrının yenidən qurulmuş binasının açılışını edəcək”, – deyə Peskov bildirib.
Onun sözlərinə görə, söhbət kökləri XIX əsrə gedib çıxan tarixi bir mədəniyyət ocağından gedir. Vaxtilə Dərbənddə yaşayan Azərbaycan ziyalıları tərəfindən yaradılan türkdilli ədəbi-dram dərnəyi sonradan məhz bu teatra çevrilib.
Peskov əlavə edib ki, açılış münasibətilə Dərbənddə Azərbaycandan da qonaqlar iştirak edəcək.
