ABŞ Hərbi Dəniz Qüvvələri (HDQ) “Virginia” sinifli “USS Massachusetts” (SSN 798) sürətli hücum sualtı qayığını istismara qəbul edib.
“Poliqon” ABŞ HDQ-yə istinadən xəbər verir ki, bununla bağlı Boston limanında mərasim keçirilib.
“USS Massachusetts”, “Virginia” sinfinin IV blokuna aid yeddinci sualtı qayıqdır və “General Dynamics Electric Boat” ilə “HII-Newport News Shipbuilding” şirkətləri arasında əməkdaşlıq çərçivəsində inşa edilib. Sualtı qayığın suya buraxılma mərasimi 6 may 2023-cü ildə Virciniya ştatının Nyuport Nyus şəhərində yerləşən gəmiqayırma zavodunda keçirilib və bu, həmin zavod tərəfindən təhvil verilən 12-ci “Virginia” sinifli sualtı qayıqdır.
ABŞ HDQ-nin donanmasına qoşulması ilə “USS Massachusetts” əhəmiyyətli döyüş qabiliyyətləri təqdim edir və ölkənin dənizdə asimmetrik üstünlüyünü gücləndirir. “Virginia” sinifli sürətli hücum sualtı qayıqları yüksək gizlilik, inkişaf etmiş müşahidə imkanları və xüsusi əməliyyatlar üçün əlavə xüsusiyyətlərlə təchiz olunub ki, bu da onların Hərbi Dəniz Qüvvələrinin çoxməqsədli tapşırıqlarını yerinə yetirməsinə imkan verir.
“Virginia” sinifli sualtı qayıqlar təxminən 7800 ton su basımına, 377 fut (təxminən 115 metr) uzunluğa və 34 fut (təxminən 10 metr) enə malikdir. Bu sualtı qayıqlar istismar müddəti ərzində yanacaq doldurulmasını tələb etməyən nüvə reaktoru ilə təchiz olunub ki, bu da istismar xərclərini azaldır və dənizdə qalma müddətini artırır.
Qeyd olunub ki, “USS Massachusetts”in istismara qəbulu ABŞ Hərbi Dəniz Qüvvələrinin “Qızıl Donanma”nın qurulmasına sadiqliyini nümayiş etdirir. 250 ildən artıqdır ki, ABŞ-ın dəniz gücü qlobal miqyasda təsirini göstərir və bu missiya davam etməklə yanaşı daha da güclənir. Donanma ilin 365 günü, sutkanın 24 saatı ön mövqelərdə fəaliyyət göstərir və bu əməliyyat tempi davamlı olaraq yeni imkanların təmin edilməsini tələb edir. “Qızıl Donanma” bu tələbin cavabıdır.
