Yaxın Şərqdə davam edən müharibə fonunda qlobal iqtisadi perspektivlərin pisləşməsi ABŞ dollarına tələbi artırıb. Ekspertlər bildirir ki, investorlar qeyri-müəyyən şəraitdə vəsaitlərini daha etibarlı hesab etdikləri aktivlərə, xüsusilə də dollara yönəldir.
Turkustan.az-ın"Bloomberg”ə istinadən məlumatına görə, dollar 2022-ci ilin sentyabrından bəri ən yaxşı aylıq nəticəsini göstərir. Müharibənin enerji bazarlarını sarsıtması, iqtisadi proqnozları zəiflətməsi və risklərin artması fonunda dollar əsas ehtiyat valyuta kimi daha da güclənib.
Bildirilir ki, "təhlükəsiz liman”a olan tələbin artması nəticəsində Bloomberg Spot Dollar İndeksi bu ay təxminən 3% yüksəlib. ABŞ-ın dünyanın ən böyük neft istehsalçısı olması və enerji qiymətlərinin artması da dolların möhkəmlənməsinə əlavə təsir göstərib.
"CIBC Capital Markets" şirkətinin strateqi Noah Buffam qeyd edib ki, "qlobal iqtisadi perspektivlərin pisləşməsi fonunda qoruyucu aktivlərə tələbat dolların artmasına səbəb olub”.
Enerji bazarlarında baş verən pozuntular, xüsusilə də Hörmüz boğazının bağlanması Avropa və Yaponiyanın neft və qaz idxalından asılılığını daha açıq şəkildə üzə çıxarıb. Bu səbəbdən investorlar dollara üstünlük verməyə başlayıb. Münaqişədən əvvəl dolların zəifləyəcəyini gözləyən treyderlər isə bu mövqelərindən geri çəkiliblər.
Bununla yanaşı, JPMorgan Chase və Goldman Sachs kimi iri maliyyə qurumları da dollarla bağlı proqnozlarını yenidən nəzərdən keçirir. Lakin yüksək volatillik və davamlı xəbər axını səbəbindən uzunmüddətli proqnozlar vermək çətinləşib.
Eyni zamanda, ABŞ Federal Ehtiyat Sisteminin faiz dərəcələrini azaltması ilə bağlı gözləntilər də zəifləyib. Buna səbəb isə artan inflyasiya riskləridir. Qısa müddətdə bazarlar dolların daha da möhkəmlənəcəyini gözləsə də, uzunmüddətli perspektivdə zəifləmə ehtimalı da istisna edilmir.
Bəzi investorlar isə fərqli mövqe sərgiləyir. Invesco və Barclays kimi qurumlar hesab edir ki, müharibə ABŞ-da siyasi qeyri-müəyyənliyi artıraraq uzunmüddətli perspektivdə dollardan uzaqlaşma tendensiyasını gücləndirə bilər.
Nathan Tuft bildirib ki, "geosiyasi risklər və inflyasiya narahatlıqları investorları qoruyucu aktivlərə yönəldib və ABŞ-ın faiz üstünlüyünü artırıb”. Lakin o əlavə edib ki, bu təsirin böyük hissəsi artıq bazar qiymətlərində nəzərə alınıb və dolların gələcək artımı məhdud ola bilər.
Digər tərəfdən, Yaxın Şərqdə müharibənin davam etməsi qlobal əmtəə bazarlarına da təsir edir. Ekspertlər qeyd edir ki, alüminium qiymətləri son iki ilin ən yüksək aylıq artımını göstərə bilər. Eyni zamanda, analitiklər Macquarie Group-un qiymətləndirməsinə əsasən, münaqişə uzanacağı halda neftin qiyməti bir barel üçün 200 dollara qədər yüksələ bilər.
Bununla belə, analitiklər müharibənin bu ayın sonuna qədər başa çatması ehtimalını daha yüksək – təxminən 60% səviyyəsində qiymətləndirirlər. /qaynarinfo.az/
