Bakı, 1 aprel, AZƏRTAC
Ölkə olaraq çox xoşbəxt və qürurluyuq.
Bunu AZƏRTAC-a açıqlamasında Türkiyə millisinin sabiq futbolçusu Tuqay Kərimoğlu deyib.
Türkiyə yığmasının dünya çempionatının Avropa zonası üzrə pley-off finalında Kosovo seçməsini 1:0 hesabı ilə məğlub etdiyi matç barədə danışan veteran yarımmüdafiçi komanda ilə qürur duyduğunu bildirib. 55 yaşlı mütəxəssisin sözlərinə görə, futbolçular çəkdikləri əziyyətin bəhrəsini görüblər.
O, “ay-ulduzlular”ın dünya çempionatındakı şanslarını da dəyərləndirib: “Düşünürəm ki, hazırkı milli komanda mundialda uğur qazana bilər”.
Türkiyə millisi DÇ-2026-nın final mərhələsində D qrupunda ABŞ, Avstraliya və Paraqvayla mübarizə aparacaq.
Qeyd edək ki, Tuqay Kərimoğlu 2002-ci ildə yığmanın heyətində dünya çempionatının bürünc medalını qazanıb.
