"Yaxın Şərqdəki gərginlik qlobal təchizat zəncirlərini dəyişdirir, yeni ticarət dəhlizləri formalaşdırır. Türkiyə bu kontekstdə investisiya maqniti kimi mövqeyini gücləndirir və iqtisadiyyatını inkişaf etdirmək üçün hər fürsətdən istifadə etməyə çalışır".
Hafta.az xəbər verir ki, bu barədə Türkiyənin xəzinə və maliyyə naziri Mehmet Şimşek Londondakı Türkiyə səfirliyində Türkiyə Prezidentliyinin İnvestisiya və Maliyyə İdarəsinin 20-ci ildönümü münasibətilə keçirilən qəbulda bildirib.
O, İran ətrafında yaranmış böhranı “regionun inkişafının üzərindəki qara bulud” adlandırıb:
“Lakin vəziyyətə daha geniş kontekstdə baxsaq, aydın olur ki, Türkiyə bu gün regionda təkcə “sabitlik adası” deyil, həm də güclü istehsal bazası və dinamik inkişaf edən xidmət mərkəzidir. Nazirlər Kabineti inflyasiyanı azaltmaq, xarici ticarət əməliyyatlarının sabitliyini təmin etmək və rəqabət qabiliyyətini artırmaq üçün proqram həyata keçirməklə ölkənin güclənməsi üçün bütün lazımi addımları atır”.
M.Şimşek qeyd edib ki, Türkiyə 1,6 trilyon dollarlıq ÜDM-ə malik və adambaşına düşən gəliri 18 min dollara qədər olan azsaylı ölkələrdən biridir.
Nazir, həmçinin Rəcəb Tayyib Ərdoğanın hakimiyyəti dövründə təxminən 360 milyard dollar investisiya qoyulan Türkiyənin güclü infrastrukturunu vurğulayıb:
“Türkiyə Orta Dəhlizin bir hissəsidir və regional nəqliyyat şəbəkələrinə investisiya qoymağa davam edir. İnanıram ki, Yaxın Şərqdəki vəziyyət yanaşmaların yenidən nəzərdən keçirilməsinə, yaşıl və rəqəmsal transformasiyanın sürətlənməsinə səbəb olacaq. Müdafiə sənayesi Ankaranın prioritetləri arasındadır. Bir çox digər sektorlarda da əhəmiyyətli potensial var”.
Şimşek bildirib ki, Türkiyə yüksək əlavə dəyərli kənd təsərrüfatı məhsulları baxımından dünyanın ilk on ölkəsi arasındadır. Ölkə kənd təsərrüfatı məhsuldarlığını artırmaq üçün səy göstərir.
Rəsmi məlumatlara görə, 2003-cü ildən bəri Türkiyəyə qoyulan ümumi xarici birbaşa investisiyalar təxminən 290 milyard dollar təşkil edib. Eyni dövrdə ölkədəki beynəlxalq şirkətlərin sayı 5 mindən təqribən 87 minə qədər artıb.
