Birləşmiş Ərəb Əmirliklərinin Əbu-Dabi şəhərində yerləşən Habşan təbii qaz obyektlərinə təşkil edilən hücum nəticəsində baş verən yanğın səbəbindən müəssisədəki fəaliyyətlər dayandırılıb.
AFN.az xəbər verir ki, rəsmi mənbələrdən verilən məlumatda hücumun dərhal ardından obyektin müxtəlif bölmələrində alovlanma müşahidə edildiyi bildirilib.
Təhlükəsizlik mülahizələri ilə iş prosesinin müvəqqəti olaraq dayandırıldığı qeyd olunub. Hadisə yerinə cəlb olunan yanğınsöndürmə briqadaları və fövqəladə hallar qrupları yanğının genişlənməsinin qarşısını almaq və zərəri minimuma endirmək üçün intensiv iş aparır.
Səlahiyyətlilər hücumun miqyası və dəymiş ziyanın tam həcmi ilə bağlı araşdırmaların davam etdiyini, işçilərin təhlükəsizliyini təmin etmək üçün bütün zəruri addımların atıldığını vurğulayıblar. Hazırda təsisatın yenidən istismara verilməsi üçün texniki qiymətləndirmə prosesi həyata keçirilir.
