İqlim dəyişikliyi kakao bitkilərinin gələcəyini təhlükə altına saldığı üçün şokolad gələcəkdə mağaza rəflərindən yoxa çıxa bilər.
Bizim.Media xəbər verir ki, bu barədə Green Economy Coalition (GEC) xəbərdarlıq edib.
Təşkilat bildirib ki, şokolada olan tələbatı ödəyən ölkələr qeyri-sabit hava şəraiti, ekstremal istilər və kənd təsərrüfatı bitkilərinin dağıdıcı xəstəlikləri səbəbindən ciddi problemlə üz-üzədir.
GEC-in məlumatına görə, ciddi müdaxilə olmazsa, Qərbi Afrikadakı kakao becərilən bölgələr 2050-ci ilə qədər istehsal üçün tam yararsız hala gələ bilər.
Təşkilat qeyd edir ki, Böyük Britaniyaya idxal edilən kakao paxlalarının təxminən 91 faizi iqlim baxımından həssas ölkələrdən gəlir.
Məlumata əsasən, kakao ağacları sabit temperatur, yüksək rütubət və nizamlı yağıntı tələb edir.
Lakin son illərdə bu balans pozulub: bir tərəfdən güclü yağışlar plantasiyalara ziyan vurur, digər tərəfdən isə quraqlıq və istilər məhsuldarlığı azaldır. GEC bu səbəbdən şokoladın gələcəyinin iqlim böhranı ilə birbaşa bağlı olduğunu vurğulayır.
Bizim.Media
