Tanınmış iranlı bəstəkar, musiqiçi və ifaçı Əli Qəmsari qeyri-adi təşəbbüslə çıxış edib: o, müstəqil sənətçi kimi ölkənin həyati vacib infrastrukturuna hücumların qarşısını almaq məqsədilə Tehranın elektrik enerjisinin yarısını təmin edən "Dəmavənd" elektrik stansiyasında müvəqqəti məskunlaşacağını elan edib. O, orada təkliyə çəkilərək musiqi bəstələyəcək və alətlərdə ifa edəcək.
Ölkə.Az-ın məlumatına görə, bu barədə o öz Telegram kanalında yazıb.
Qəmsari izah edib ki, aksiyasının məqsədi "musiqinin insanın işığı və həyatı olduğunu, infrastruktur obyektlərinə olan təhdidlərin isə yalnız hərbi qarşıdurma kimi qiymətləndirilməməli olduğunu" nümayiş etdirməkdir. O vurğulayıb ki, dağılmış infrastrukturun bərpası illər aparır, buna görə də mümkün humanitar fəlakətdən əvvəl hərəkətə keçmək vacibdir.
Bəstəkar digər sənətçiləri və musiqisevərləri elektrik stansiyasına yaxınlaşmamağa, təşəbbüsü media vasitəsilə izləməyə çağırıb, çünki obyekt hücumlar üçün potensial hədəf elan edilib. Müraciətində Qəmsari qeyd edib:
"Mən hər zaman müstəqil sənətçi olmuşam, xalqın yanında və zülmə qarşı dayanmışam... Lakin mənim etiraz ruhum vətənimə olan sevgimə mane olmur. Bu günlərdə biz ölkənin həyati vacib infrastrukturuna — körpülərə və sənaye müəssisələrinə qarşı düzəlməz hücumlarla üzləşirik ki, bu da İranın və onun xalqının həyatını təhlükə altına qoyur. Arzu edirəm ki, infrastruktur müharibəsinin daha ciddi mərhələsi başlamazdan əvvəl öz işığım sönməsin və torpağımızın bircə qarışının belə əlimizdən alınmasını heç vaxt görməyim. Mən hər zaman üç prinsipə sadiq qalmışam: şəxsi həyatda dürüstlük, öz iradəsinə söykənən etiraz və xarici müdaxiləyə inamsızlıq."
O əlavə edib ki, Tehranın 40%-i üçün elektrik enerjisini qorumaq naminə əlindən gələni etməyə hazırdır, çünki stansiya həyati resursları — elektrik və suyu təmin edir. Qəmsari vurğulayıb ki, "müharibənin məqsədi heç vaxt xilas etmək deyil, İran xalqı isə çoxminillik tarixinə və dürüst qəlbinə arxalanaraq böhranın öhdəsindən gəlməyə qadirdir".
