Macarıstanda seçkilər ərəfəsində Baş nazir Viktor Orbanın hakimiyyəti dövründə böyümüş gənc nəsil getdikcə daha mühüm rol oynayır. Bu seçici qrupu müxalifətin əsas dayaqlarından birinə çevrilir və bəzi gənclər Orban yenidən seçiləcəyi təqdirdə ölkədən köçməyi düşündüklərini açıq şəkildə bildirirlər...
Poliqon xəbər verir ki, bu barədə Reuters məlumat yayıb.
Artıq 16 ildir hakimiyyətdə olan Orban bu dəfə ən ciddi siyasi sınaqla üzləşib. Sorğular onun rəqibi Peter Madyarın və onun rəhbərlik etdiyi Tisza Partiyasının populyarlığının artdığını göstərir. Nəşrin yazdığına görə, bu partiya xüsusilə gənclər arasında sürətlə dəstək qazanır.
Sosioloqların fikrincə, hazırda gənclər hakim Fides Partiyasına ən tənqidi yanaşan sosial qrupdur. Ekspertlər qeyd edir ki, partiyanın gündəliyi gənc nəslin maraqlarını kifayət qədər əks etdirmir. Xüsusilə tələbələr siyasi baxımdan aktiv və həssas qrup kimi seçkilərin nəticələrinə ciddi təsir göstərə bilər.
Sorğular göstərir ki, 18–29 yaş qrupunda Fidesə dəstək çox aşağı səviyyədədir və bu göstərici ölkə üzrə orta nəticələrdən xeyli geri qalır.
Gənclərin narazılığı əsasən gündəlik problemlərlə bağlıdır: təhsilin keyfiyyəti, mənzil əlçatanlığı və ümumi həyat səviyyəsi. Nəşr yazır ki, gənc macarlar getdikcə daha çox korrupsiya, məhdud imkanlar və ölkədə perspektivlərin olmamasından şikayət edirlər.
Sosioloq Daniel Oroş bildirib: "Fides Partiyasının düşüncə tərzi artıq gənclərin ehtiyaclarını nəzərə almır".
2022-ci ildə Ukraynada müharibənin başlanmasından sonra iqtisadi vəziyyətin pisləşməsi də əlavə təsir göstərib. İnflyasiyanın artması daha çox insanın miqrasiyanı real alternativ kimi görməsinə səbəb olub.
Bu riskləri nəzərə alan Viktor Orban gəncləri cəlb etmək üçün bir sıra addımlar atıb. Bunlara 25 yaşadək vətəndaşlar üçün gəlir vergisinin ləğvi və güzəştli ipoteka proqramları daxildir. Lakin müşahidələr göstərir ki, bu tədbirlər hələlik kifayət etmir.
Eyni zamanda Orban bəzi çıxışlarında gənclərin tənqidinə sərt reaksiya verərək etirazları "süni" adlandırıb və dövlət dəstəyini xatırladıb.
Müxalifət isə əsas diqqəti məhz gənclərə yönəldib. Peter Maqyar təhsil, iqtisadiyyat və Avropa İttifaqı ilə münasibətlərin yaxşılaşdırılması, o cümlədən Avropa maliyyəsinin bərpası kimi islahatlar vəd edir.
21 yaşlı Jolt İşvan bildirib: "Gənclər arasında Fides artıq qocalmış, korrupsiyalaşmış və dəyişməyən bir qrup kimi qəbul olunur".
Artan narazılıq fonunda bəzi gənclər seçkiləri dəyişiklik üçün şans hesab etsə də, digərləri skeptik yanaşır və Orban hakimiyyətdə qalacağı təqdirdə ölkəni tərk etməyi planlaşdırır.
18 yaşlı Tamara Budapeştdə bildirib: "Mən Fidesə səs verən və ya onun dəyərlərini dəstəkləyən insanların çoxluq təşkil etdiyi ölkədə yaşamaq istəmirəm".
Bununla belə, bütün gənclər Orbanın əleyhinə deyil. 18 yaşlı Gerqo onun təcrübəsini yüksək qiymətləndirir və bildirir ki, Orbanın beynəlxalq əlaqələri Macarıstan üçün vacibdir.
"Bu, əsl macar lideridir", deyə Gerqo bildirib və siyasi səbəblərlə ölkəni tərk etməyi "xəyanət" kimi qiymətləndirib.
Reuters daha əvvəl yazıb ki, Viktor Orban 12 aprel tarixində keçiriləcək parlament seçkilərində hakimiyyəti itirə bilər. Əks halda, Avropa İttifaqı Macarıstanla münasibətlərin gələcəyini yenidən nəzərdən keçirməli olacaq.
Həmçinin Peter Maqyar bildirib ki, Orbanın qələbəsi Macarıstanın Avropa İttifaqından çıxması riskini artıra bilər. Onun sözlərinə görə, Fides artıq Bizim Vətən adlı sağçı partiya ilə mümkün koalisiya variantını nəzərdən keçirir ki, bu da ölkənin siyasi kursuna təsir göstərə bilər.
Poliqon.info
