Qızılın qiyməti, ABŞ Prezidenti Donald Tramp ilə İranın qlobal bazarları alt-üst edən müharibəni sona çatdırmaq üçün danışıqları tamamlamaq məqsədilə iki həftəlik atəşkəs barədə razılığa gəlməsindən sonra yüksəlib.
Marja xəbər verir ki, külçə qızıl əvvəlki sessiyada qeydə aldığı 1,2%-lik artımdan sonra 3,1%-ə qədər yüksələrək bir unsiyasının qiyməti 4850 dolları keçib.
Tramp sosial şəbəkə paylaşımında bildirib ki, İranın bütün sivilizasiyasını (mədəniyyətini) məhv etməyə yönəlmiş özünün müəyyən etdiyi son tarixə iki saatdan az vaxt qalmış bombardmanı dayandırmağa razılaşıb və Hörmüz boğazının yenidən açılmasının atəşkəs üçün əsas şərt olduğunu vurğulayıb. İran isə boğazdan təhlükəsiz keçidin iki həftə ərzində “mümkün” olacağını açıqlayıb.
Neft qiymətləri bir barel üçün 100 dolların aşağı düşərkən, dollar da zəifləyib; bu isə ABŞ dolları ilə qiymətləndirilən qızılı dəstəkləyib. Səhmlər isə 2%-dən çox yüksəlib. Yaxın Şərqdə müharibə başlayandan bəri qızıl əsasən səhmlərlə paralel hərəkət edib; bəzi investorların portfellərindəki itkiləri kompensasiya etmək ehtiyacı qızılın ənənəvi “təhlükəsiz liman” xüsusiyyətini zəiflədib.
Altıncı həftəsinə daxil olan münaqişə enerji qiymətlərində sıçrayışa və inflyasiya risklərinin artmasına səbəb olub, bu isə mərkəzi bankların faiz endirimlərini təxirə salması və ya hətta artırması ehtimalını gücləndirib. İstiqraz investorları ABŞ Mərkəzi Bankının (FED) ilin qalan hissəsində borclanma xərclərini sabit saxlayacağını gözləyirlər.
Qızıl müharibənin fevralın sonunda başlamasından bəri təxminən 10% dəyər itirib. Son günlər qızılın qiymətinin "mülayim" bərpası isə atəşkəs gözləntiləri və qlobal iqtisadi artımın zəifləmə ehtimalının sabit və ya daha yüksək faiz gözləntilərini balanslaşdıracağı düşüncəsindən qaynaqlanıb.
Bakı vaxtı ilə saat 08:30-a olan məlumata görə qızıl 2,05% bahalaşma ilə 4805 dollara ticarət olunub.
Gümüşün qiyməti 5,4% artaraq 76,92 dollara çatıb. Platin və palladium da bahalaşıb. ABŞ dollarının gücünü ölçən Bloomberg Dollar Spot Index isə 0,8% geriləyib.
