Rusiyanın "TASS" agentliyi hərbi-diplomatik dairələrdəki mənbəsinə istinadən şok məlumat yayıb. Məlumata görə, Ukrayna Silahlı Qüvvələri Norveçin köməyi ilə Barents və Norveç dənizlərində Rusiya gəmilərinə qarşı genişmiqyaslı diversiyalar planlaşdırır.
Musavat.com xəbər verir ki, iki ölkənin Müdafiə nazirlikləri hazırda dəniz dronlarının (suüstü PUA-lar) arktik soyuq şəraitdə tətbiqini sınaqdan keçirirlər. Mənbənin iddiasına görə, Ukrayna Hərbi Dəniz Qüvvələrinin 385-ci əlahiddə xüsusi təyinatlı dəniz dron briqadasının təxminən 50 hərbçisi artıq Norveçə gəlib və onların əsas vəzifəsi dəniz pilotsuz aparatlarını dondurucu iqlimdə idarə etməyi öyrənməkdir.
Ukraynanın Qara dənizdəki uğurlu təcrübəsini Şimal dənizinə daşımaq niyyətində olduğu, əsas hədəfin isə Rusiyanın şimaldakı strateji ticarət gəmiləri və dəniz infrastrukturu olduğu bildirilir. Norveçin təlim bazası və texnoloji dəstək mərkəzi kimi çıxış etdiyi bu gizli hazırlıqlar çərçivəsində, pilotsuz aparatların buzlu su şəraitində batareya ömrü və naviqasiya dayanıqlığı hərbi mütəxəssislər tərəfindən ciddi şəkildə araşdırılır.
Rusiya tərəfi bu fəaliyyəti kəskin tənqid edərək Norveçi münaqişəyə birbaşa cəlb olunmaqda ittiham etsə də, analitiklər bu addımın Rusiya donanmasının şimaldakı logistik üstünlüyünə ağır zərbə vura biləcəyini vurğulayırlar.
Musavat.com
