Britaniyada enerji qiymətlərinin kəskin artımına görə, Starmer ABŞ və Ruisya liderlərini günahlandırıb...
Poliqon Politico nəşrinə istinadən xəbər verir ki, Böyük Britaniyanın Baş naziri Kir Starmer Yaxın Şərqə səfəri zamanı Donald Trampı İrana qarşı müharibə başlatmaqda ittiham edib, İsrailin Livana zərbələrinə görə sərt tənqid edib
Böyük Britaniyanın Baş naziri Kir Starmer Yaxın Şərqə səfəri zamanı ITV-yə müsahibəsində ABŞ Prezidenti Donald Trampı Rusiya Prezidenti Vladimir Putinlə müqayisə edib. O bildirib ki, Britaniyada enerji ödənişlərinin artması məhz onların hərəkətlərinin nəticəsidir.
Nəşrin yazdığına görə, İranla müharibə və Hörmüz boğazının bağlanması fonunda neftin qiymətinin kəskin şəkildə yüksəlməsi Böyük Britaniyada yaşayış xərcləri ilə bağlı təzyiqləri daha da artırıb. Bu şəraitdə Starmer boğazın yenidən açılması üçün beynəlxalq koalisiya formalaşdırmağa çalışır.
Bununla yanaşı, Britaniya hökumətinin münaqişənin ilkin mərhələsində ABŞ-yə Britaniya bazalarından hücum xarakterli əməliyyatlar üçün istifadə icazəsi vermədiyi bildirilir. Bundan sonra Donald Trampın Starmerə qarşı təhqiramiz ifadələr səsləndirdiyi qeyd olunur.
Kir Starmer, həmçinin Trampın “sivilizasiyanın məhv olması” ilə bağlı təhdidkar ritorikasından da açıq şəkildə qınayıb. Baş nazir bildirib ki, “bu, mənim istifadə edəcəyim dil deyil” və əlavə edib ki, o, qərarlarında Britaniya dəyərlərini rəhbər tutacaq.
Starmer İsrailin atəşkəs dövründə Livana endirdiyi zərbələri də daha sərt tənqid edib. Onun sözlərinə görə, hüquqi və ya texniki izahlardan asılı olmayaraq, bu addımlar “yanlışdır” və dayandırılmalıdır.
Politico vurğulayır ki, Britaniya baş nazirinin bu açıqlamaları ölkədə yaxınlaşan yerli seçkilər və həyat bahalılığı ilə bağlı narazılığın artdığı bir vaxta təsadüf edir. Enerji qiymətlərinin sürətlə yüksəlməsi fonunda hökumət üzərində siyasi təzyiq də getdikcə güclənir.
Starmerin həm Trampa, həm də İsrailin son hərbi addımlarına yönəlmiş tənqidi fikirləri göstərir ki, London regiondakı böhran fonunda daha müstəqil və seçici mövqe nümayiş etdirməyə çalışır. Eyni zamanda, ölkə daxilində sosial-iqtisadi narazılığın dərinləşməsi bu mövqenin siyasi çəkisini daha da artırır.
Poliqon.info
