"Heyəti gücləndirməyə ehtiyac var" - Qurban Qurbanov

"Qarabağ" Misli premyer-liqasının 27-ci turunda "Şamaxı" ilə heç-heçə etdi - 0:0.

"Football-plus.az" xəbər verir ki, Ağdam təmsilçisinin baş məşqçisi Qurban Qurbanov oyunsonrası mətbuat konfransında jurnalistlərin suallarını cavabladı.

- Futbolçularıma və azarkeşlərimizə təşəkkür edirəm. Qalib gələ bilməsək də, son saniyələrə kimi yaxşı mübarizə getdi. Futbolçular qol vurmaq üçün çox güc sərf etdilər. Belə hallar olur. Edəcək bir şey yoxdu. Qarşıdakı oyunlara hazırlaşmalıyıq. Ayxan Abbasova və komandasına uğurlar arzulayıram.

- Bügünkü xal itkisi çempionluq mübarizəsinə nə dərəcədə təsir edəcək?
- Çoxdan təsiri olub. Bu matçdan əvvəl bir oyunumuz az olsa da, 10 xallıq fərq var idi. Bu, az deyil. "Sabah" çox yaxşı futbol nümayiş etdirir. Qarşıdakı oyunlarda daha pozitiv olmalıyıq. Futbolçuların idman formasını, peşəkarlığını daha da yaxşılaşdırmağa çalışacağıq.

- Dediklərinizdən belə başa düşdük ki, artıq taleyinizlə barışmısız. Amma mövsümü titulla başa vurmaq üçün ölkə kuboku var. Bundan sonra diqqəti kuboka yönəldəcəksiz?
- Yox. Çempionatda da qarşıda maraqlı oyunlarımız var. "Sabah" və "Neftçi" ilə matçlarımız olacaq. Sona kimi mübarizə aparacağıq. Titula gəlincə, belə illər olur, sanki alınmır. Sona qədər azarkeşlərimiz üçün yaxşı futbol göstərmək istəyirik. Mübarizəmiz sona kimi olacaq.

- Bir neçə gün öncə sizin iştirakınızla klub rəhbərliyinin iclası keçirildi. Həmin toplantıda gələcəklə bağlı nələr müzakirə olundu?
- Komanda elə şeydi ki, düşüncələrimizi dərhal həyata keçirmək olmur. Hansısa dəyişikliklər etmək istəyərdik. Komandaya yeni futbolçular cəlb etmək istəyirik. Soyuqqanlı davranmalıyıq. Heyəti gücləndirməyə ehtiyac var.

- Abdulla Zubirin Qətər klubuna keçəcəyi ilə bağlı xəbərlər yayılıb. Bu, nə dərəcədə realdı?
- Məndə belə məlumat yoxdu.

- Futbolçulara gələn təkliflərin komandanın oyununa təsiri olub?
- Təsiri olub. Artıq gecdi. Bütün futbolçular uğurlu mövsüm keçirdi. Çempionlar Liqasındakı nəticələrdən sonra 70-80 faiz futbolçuya təkliflərr oldu. İstər-istəməz onlar üçün özlərini ələ almaq çətin olur. Olan oldu. Başa düşürük ki, təkliflərin olması futbolun qanunudu. Bizim kimi yeni formalaşan komanda üçün belə halların mənfi təsiri var. Amma hər bir halda futbolçuları toparlamağa çalışdıq.

- Legionerlərə təkliflər gəlir, amma yerli futbolçuların adı xarici klublarla hallanmır. Bunun səbəbi nədi?
- Yerlilərə də var idi.