Koronavirus bütün dünyada çoxdan unudulsa da, paytaxt Bakıda küçələr hələ də virus əleyhinə dezinfeksiya edilir. Bununla bağlı görüntülər sosial şəbəkələrdə müzakirələrə səbəb olub. Dezinfeksiya işləri koronavirusun yenidən qayıdacağı ehtimallarını gücləndirib.
Milli Məclisin Səhiyyə komitəsinin üzvü Müşfiq Məmmədli Pravda.az-a açıqlamasında deyib ki, inkişaf etmiş ölkələrin paytaxtlarında da küçələrin dezinfeksiya edilməsi rutin qaydadır.
Deputat bildirib ki, dezinfeskiyada məqsəd təkcə koronavirusa qarşı mübarizə deyil: “Dezinfeksiya şəhər atmosferinin ayrılmaz tərkib hissəsi olmalıdır. Bizim paytaxtımızda da bu proses həyata keçirilir. Bir şeyi nəzərə alın ki, istər yağışlardan sonra, istər müəyyən təbii hadisələrdən, yaranan daşqınlardan sonra küçələrin dezinfeksiya olunması məntiqlidir, təqdir olunandır, alqışlanılacaq addımdır. Bununla bərabər, təbii ki, koronavirusa qarşı tədbirlərimizi görürük. Bilirsiniz ki, Azərbaycan bu istiqamətdə ən aparıcı, zamanında tədbir görən ölkələrdən biridir. Bu, Ümumdünya Səhiyyə Təşkilatı hesabatında göstərilib. Digər səhiyyə qurumları da bu istiqamətdə Azərbaycan dövlətinin, hökumətinin, strukturlarının fəaliyyətini çox müsbət dəyərləndirmişdilər. Əks epidemik tədbirlərin görülməsi vacibdir, məqsədəmüvafiqdir”.
Aytəkin Qardaşova
