Mənbələrin məlumatına görə, Xəzər Boru Kəməri Konsorsiumu (Caspian Pipeline Consortium, CPC) mart ayında neft ixracını fevral ayı ilə müqayisədə 48% artırıb. Bu artım Tengiz yatağında hasilatın bərpası hesabına mümkün olub.
“Chevron” rəhbərliyi ilə işlənən Tengiz Qazaxıstanın ən böyük yatağıdır və qlobal gündəlik neft hasilatının təxminən 2%-ni təmin edir. Bu neft əsasən Rusiyanın Novorossiysk limanına ixrac olunur.
Yatağın istismarı ilə məşğul olan “Tengizchevroil” şirkəti yanvar ayında Qərbi Qazaxıstanda yerləşən obyektlərdə elektrik kəsintiləri səbəbindən hasilatı dayandırmışdı.
Ötən həftə “Tengizchevroil”in baş direktoru Uilyam Lakobi yataqda tammiqyaslı hasilatın uğurla bərpa edildiyini bildirib.
Mənbələrin sözlərinə görə, Tengiz–Novorossiysk boru kəməri ilə neft nəql edən CPC mart ayında ixracı 6,196 milyon tonadək artırıb ki, bu da gündə 1,58 milyon barelə bərabərdir. Müqayisə üçün, fevralda bu göstərici 3,79 milyon ton və ya 1,07 milyon barel olub.
CPC nümayəndələri məsələ ilə bağlı şərh verməkdən imtina ediblər.
Şirkətin üzləşdiyi çətinliklər arasında Ukrayna pilotsuz uçuş aparatlarının Rusiyadakı terminala endirdiyi zərbələr də var. Noyabrın sonunda baş verən hücum nəticəsində üç üzən yanalma qurğusundan biri dağıdılıb və CPC fəaliyyətini müvəqqəti dayandırmaq məcburiyyətində qalıb.
Qazaxıstanın Energetika Nazirliyi isə bildirib ki, Ukrayna tərəfindən yükləmə infrastrukturuna zərər dəysə də, CPC vasitəsilə neft ixracı sabit olaraq qalır.
